Յունիբանկը գործարկել է մինչև 1 մլն դրամ գումարով U-Student+ սպառողական նոր վարկ, որը նախատեսված է բարձրագույն ուսումնական հաստատություններում ուսման վարձը վճարելու համար:
Վարկի համար կարող են դիմել ուսանողները կամ նրանց ընտանիքների անդամները, որոնք չունեն բացասական վարկային պատմություն:
U-Student+ վարկը ձևակերպելու համար անհրաժեշտ է ներկայացնել անձնագիր, սոցիալական քարտ, տեղեկանք աշխատավայրից և բուհից: Վարկի ժամկետը կազմում է 12 ամիս, տարեկան տոկոսադրույքը` 20%:
Վարկային պայմանագիրը ստորագրելուց հետո գումարը փոխանցվում է ուսումնական հաստատության հաշվին:
Վարկի մարումն իրականացվում է ամենամսյա հավասար վճարումներով: Վարկային հայտի հաստատումը չի գերազանցում 3 աշխատանքային օրը` հաճախորդի կողմից անհրաժեշտ փաստաթղթերի ներկայացումից հետո:
«Յունիբանկի» նոր վարկը հնարավորություն է տալիս դրամական միջոցների անբավարար լինելու դեպքում ժամանակին վճարել ուսման վարձը:
Վարկը տրամադրվում է մեկ ուսումնական սեմեստրի վճարի չափով, բայց այն մարելուց հետո հաճախորդը կարող է դիմել նոր վարկ ստանալու համար: Հաշվի առնելով այն փաստը, որ վարկը տրամադրվում է ուսման համար, բանկը չի պահանջում կանխավճար և գրավ: Ֆիզիկական անձանց երաշխավորությունը բավարար է»,- ասում է «Յունիբանկի» սպառողական և քարտային վարկավորման տնօրեն Ծովինար Վարդանյանը:
2011թ. երրորդ եռամսյակի տվյալներով` «Յունիբանկը» ֆիզիկական անձանց վարկավորման ծավալներով ընդգրկվել է Հայաստանի առաջատար բանկերի հնգյակում:
30.09.11-ի դրությամբ «Յունիբանկի» կողմից ֆիզիկական անձանց տրամադրված վարկերի ծավալը կազմել է 24.3 մլրդ դրամ: