Այսօր լրագրողների հետ հանդիպման ժամանակ «ԱրմենՏել» ՓԲԸ-ի հաճախորդների և սպասարկման ծառայության ղեկավար Բուրաստան Մովսիսյանը ներկայացրեց «Օնլայն խորհրդատու» նոր ծառայությունը. «այս ծառայությունը շատ յուրահատուկ է և, մեր տվյալներով, այսպիսի ծառայություն Հայաստանում որևէ օպերատոր կամ ինտերնետ փրովայդեր դեռևս չունի: Ծառայությունը մի նոր ուղղություն է, սպասարկումն իրականացվելու է ոչ միայն հեռախոսակապի միջոցով, այլ նաև մեր ինտերնետային կայքի միջոցով «www.beeline.am»: Կարծում եմ, որ այս ծառայությունը հանդիսանում է նոր և հարմարավետ միջոց հաճախորդների սպասարկման համար»:
ԱրմենՏել ՓԲԸ-ն /Beeline ապրանքանիշ/ «Վիմպել Կոմ Լթդ» ընկերությունների խմբի անդամ է և իր այս նոր ծառայությունով միակն է այդ խմբում: «Վիմպել Կոմ Լթդ» խումբն ընդգրկում է ձայնային կապի ծառայություններ, կապի տելեմատիկ ծառայություններ, տվյալների փոխանցման ծառայություններ անլար և ֆիքսված հեռախոսակապի տեխնոլոգիաների հիման վրա, ինչպես նաև լայնաշերտ Ինտերնետ հասանելիության ծառայություններ մատուցող կապի օպերատորներ:
Մուտք գործելով ««www.beeline.am» կայք և սեղմելով համապատասխան կոճակը՝ հաճախորդը հնարավորություն կունենա կապ հաստատել օպերատորների հետ և հուզող հարցերին պատասխան ստանալ: Ծառայությունը շուրջօրյա է և անվճար: