Երևանի հայկական պետական մանկավարժական համալսարանից «Առաջին լրատվական»–ին հայտնում են, որ Ուսանողության միջազգային օրվա կապակցությամբ Խաչատուր Աբովյանի անվան մանկավարժական համալսարանը և ՀՀԿ երիտասարդական կազմակերպությունը Ալ. Սպենդիարյանի անվան օպերայի և բալետի ազգային ակադեմիական թատրոնի դահլիճում կազմակերպել էին տոնական համերգ, որին մասնակցել է նաև ՀՊՄՀ խորհրդի նախագահ, վարչապետ Տիգրան Սարգսյանը: Ներկա են եղել համալսարանի կառավարման խորհրդի անդամները, ԱԺ պատգամավորներ: Միջոցառման ընթացքում Ամենայն հայոց կաթողիկոսի ուղերձն ու օրհնանքի խոսքը փոխանցել է Անուշավան եպիսկոպոս Ժամկոչյանը:
Ապա հայտարարվել է Մանկավարժական համալսարանի 2011 թվականի լավագույն ուսանողի անունը` հոգեբանության և սոցիալական մանկավարժության ֆակուլտետի մագիստրատուրայի 1-ին կուրսի ուսանողուհի Սառա Վանյան: Նրան համալսարանն ընձեռել է Լոնդոն մեկնելու և երկշաբաթյա ուսումնական ծրագրի մասնակցելու հնարավորություն:
Իսկ ֆակուլտետների 9 լավագույն ուսանողներ կմեկնեն հանգստանալու Կարմիր Ծովի ափին գտնվող նշանավոր Շարմ Ալ Շեյխ:
2010 թվականի լավագույն ուսանողը ճանաչված Տաթև Ենոքյանը Սառա Վանյանին է հանձնել Համալսարանի լավագույն ուսանողի փոխանցիկ մեդալը:
Ապա միջոցառումը շարունակվել է տոնական համերգով, որի ընթացքում առաջին անգամ հնչել են սիրված երգեր՝ բոլորովին նոր ձևով ու ոճով`սիմֆոնիկ նվագախմբի նվագակցությամբ: Հանդես են եկել Լեյլա Սարիբեկյանը, Արամոն, Անդրեն, Միստր Իքսը, Էրիկը և Մհերը:
Միջոցառման ավարտին «Մանկավարժական համալսարանի Գարի Քյոսայանի ջազ քառյակը» կատարել է սիրված ջազային ստեղծագործություններ:
