Վրաստանի նախագահ Միխեիլ Սահակաշվիլին երեկ գրեթե 3.5 կմ լող է տվել Բաթումի զբոսանավերի ակումբի տարածքում` ցուցադրելով վրացական սեւծովյան լողափերը:
Դրանից հետո նա iPod-ի միջոցով համեմատել է ջրի ջերմաստիճանը եւ օդի խոնավությունը Բաթումում եւ աշխարհի ամենահայտնի, այդ թվում` սեւծովյան և միջերկրածովյան հանգստավայրերում:
«Ինչու՞ է ընդունված կարծել, եւ շատերն են այդ մասին ասում, որ Բաթումում խոնավությունը բարձր է, եւ դա անհարմարություն է առաջացնում: Մինչդեռ հիմա խոնավության աստիճանը շատ հայտնի ծովափերում ավելի բարձր է, քան մեզ մոտ»,- նշել է նախագահը` համեմատելով այդ համացանցով ստացված տվյալները:
Բաթումում այդ պահին եղել է 29 աստիճան, 45% խոնավություն, Թուրքիայի Բոդրումում` 22 աստիճան, 68% խոնավություն, Ուկրաինայի Յալթայում` 18 աստիճան, 67% խոնավություն, Նիցցայում` 6 աստիճան, 53% խոնավություն:
Բացի այդ, Սահակաշվիլին դրել է «Վրացական այբուբենի» աշտարակի հիմքը, որը կառուցում են Բաթումի կենտրոնում: Կառուցվող աշտարակը նա համեմատել է Էյֆելյան աշտարակի հետ եւ շինարարներից պահանջել ավարտել այն 5 տարվա ընթացքում:
