Մանկական Եվրատեսիլ 2011-ը կվարեն հաղորդավարներ Գոհար Գասպարյանը և Ավետ Բարսեղյանը: Այս մասին այսօր լրագրողների հետ հանդիպմանը տեղեկացրին Մանկական Եվրատեսիլ 2011-ի կազմկոմիտեի ղեկավար Արտակ Վարդանյանը և հաղորդավար Գոհար Գասպարյանը:
Նրանք նաև տեղեկացրին, որ եվրատեսիլային տոմսարկղերում սպառվել են գրեթե բոլոր մատչելի տոմսերը:
«Առաջին անգամ Հայաստանում լինելու է հրավառություն-ներկայացում, որը ստանալու ենք մեծ ջանքերի շնորհիվ»,- նշեց Ա. Վարդանյանը` հավելելով, որ դեկտեմբերի 2-ին և 3-ին հանդիսատեսը ականատեսը կդառնա հզոր միջոցառման:
Անդրադառնալով շոուի մասնակիցներին` բանախոսներն ասացին, որ ոչ մրցութային հատվածում իրենց մասնակցությունն են ունենալու Եվրատեսիլ 2010-ի հաղթող Վլադիմիր Արզումանյանը և Սիրուշոն:
«Մենք նաև ունենալու ենք եվրոպական շատ հյուրեր, սակայն այդ մասին կտեղեկացնենք ավելի ուշ»,-ասաց Արտակ Վարդանյանը` հավելելով, որ այս տարվա հաղթողի մրցանակի արձանիկի հեղինակը Նուռն է:
Ի դեպ, նշենք, որ Մանկական Եվրատեսիլ 2011-ը Հայաստանում անցկացվում է «Հասիր բարձունքին» կարգախոսով և world vision կազմակերպության աջակցությամբ:
Գոհար Գասպարյանը ասաց նաև, որ մասնակցելու են նաև Եվրատեսիլին միշտ մասնակցություն ունեցած 13 ներկայացուցիչներ, և արտերկրից Հայաստան են ժամանելու շուրջ 50 լրագրողներ:
Բանախոսները նաև նշեցին, որ Հայաստանը ներկայացնող երգչուհի Դալիթան լիովին պատրաստ է իր ելույթին, պատրաստ են շոուի անհրաժեշտ տարրերը: Հաղորդավարը հավաստիացրեց, որ ամեն ինչ արվում է` եվրոպական մակարդակի շոու ապահովելու համար:
