2011թ. «Եվրատեսիլ» երգի մրցույթում Հայստանը կներկայացնի Էմմին:
Մենք փորձեցինք երգչուհի Շուշան Պետրոսյանից պարզել, թե նա ինչ է մտածում «Եվրատեսիլ» երգի մրցույթի մասին և ինչպես է ընդունում, որ մեր երկիրը պետք է ներկայացնի նա, ով մեծ սկանդալով հեռացավ Հայաստանից, ինչ է թե գրավել էր 2-րդ տեղը:
«Կարծում եմ, որ Եվրատեսիլն աշխարհում ամենաախմախ մրցույթն է: Ես երբեք չեմ հետաքրքրվել Եվրատեսիլով, հիմա էլ նայում եմ նրա համար, որովհետև Հայաստանը մասնակցում է: Քաղաքականացված երևույթը ինձ երբեք չի բավարարել, ես պարզապես խելագարվում եմ, երբ տեսնում եմ, թե ինչպես են հարևան երկրներն իրար միավորներ տալիս, որովհետև այդպես է պետք»,- նշեց Շուշան Պետրոսյանը:
Նա ավելացրեց, որ շատ հանգիստ է Էմմիի համար և չի կասկածում նրա «զիլ» երգչուհի լինելու վրա. «Ուրախ եմ` վերջապես այս մի քանի տարվա ձգտումը, ցանկությունը իրականացան, բայց ի՞նչ է իրեն տալու: Այդ մրցույթը ոչինչ չի տալիս»:
Մեր այն հարցին, որ Էմմիի թեկնածությունն առանց ընտրության որոշվեց, չի գալիս նրանից, որ մենք չենք կարողանում «թափանցիկ և արդար» ընտրություններ կազմակերպել, երգչուհին պատասխանեց, որ մենք միշտ էլ ընտրության հետ խնդիր ունենք, դա ուրիշ հարց է. «Ես շատ ուրախ եմ, որ առանց ընտրության որոշվեց, թե ով է գնալու, որովհետև այլևս խոսակցություններ չեն լինի, իրար միս չեն ուտի, չեն քննարկի, չեն վատաբանի, մենք էլ կփորձենք կանգնել կոնկրետ մի մարդու կողքին և «դուխ կտանք»: Եթե Էմմին միայնակ հարցեր լուծել, շատ լավ կլիներ, բայց ցավոք, իր հարցերը ինքը չի լուծում»,-ավելացրեց երգչուհին:
Հիշեցնենք, որ որոշումն ընդունվել է Հայաստանի հանրային հեռուստաընկերության գեղարվեստական խորհրդի կողմից: