Պաշտոնական Բաքուն հուսով է, որ 2010թ. հոկտեմբերի 7-13-ը Լեռնային Ղարաբաղում ԵԱՀԿ անցկացրած փաստահավաք առաքելության այցի արդյունքով կպատրաստվի արդար զեկույց։ Այս մասին, Interfax-ի փոխանցմամբ, հայտարարել է Ադրբեջանի նախագահ Իլհամ Ալիեւը։ «Քանի որ դրանք մեր տարածքներն են, եւ հայկական կողմը այնտեղ ավերել է բոլոր շինությունները, քարը քարի վրա չի մնացել, ավերվել և թալանվել են մեր բոլոր պատմական հուշարձանները, մզկիթները, տները»,- հայտարարել է Ալիեւը 2010թ. 9 ամիսների սոցիալ-տնտեսական զարգացման արդյունքների վերաբերյալ կառավարության խորհրդակցության ժամանակ։ «Գրավյալ տարածքներում իրականացված հանցագործությունները ցույց են տալիս հայկական ֆաշիզմի վայրի դեմքը»,- ասել է նա՝ հավելելով, որ շատ լավ է, որ համաշխարհային հանրությունը եւս մեկ անգամ հավելյալ տեղեկություններ կստանա։ «Ես հուսով եմ, որ այդ զեկույցը կդառնա օբյեկտիվ և կարտացոլի իրողությունները»,- ասել է Ադրբեջանի նախագահը։ Ալիեւը նաեւ նշել է, որ Հայաստանի եւ Ադրբեջանի տնտեսական զարգացման ցուցանիշերի տարբերությունը տարեցտարի ավելի է մեծանում, եւ «ուժեղ ռազմական պոտենցիալ ունեցող ադրբեջանական կողմը կլուծի տարածքների խնդիրը»։