Իրանական լրատվամիջոցները կտրուկ քննադատության են ենթարկել Թուրքիայի վարչապետ Ռեջեփ Թայիփ Էրդողանին անտառային հրդեհների ժամանակ Իսրայելին ցուցաբերված հումանիտար օգնության համար: Այս մասին գրել է իսրայելական Cursor կայքը: Կայքը նաև գրում է, որ Իրանի իշխանակական պարբերականները ափսոսանք են հայտնել Անկարայի իրականացրածի կապակցությամբ, երբ Թուրքիան, դավաճանելով իր հակասիոնիստական հայացքներին, օգնություն է ցուցաբերել Իսրայելին` հրդեհները մարելու համար Հայֆա ուղարկելով երկու ինքնաթիռ:
«Ինչպես պարզվեց, Էրդողանի քննադատությունն ընդդեմ սիոնիստների պայմանավորված է նրա անհատական դիրքորոշմամբ և կապ չունի պետական գործունեության հետ: Սիոնիստներին ցուցաբերված օգնությունը ապացուցում է, որ Թուրքիան պատրաստ է կատարել ԱՄՆ-ի ամեն մի ցանկություն»,- գրում է «Ջումահուրի իսլամի» թերթը: Թերթը նաև ավելացնում է. «Թուրքիայի թուլությունն այն է, որ շարունակում է պահել ռազմավարական, քաղաքական, տնտեսական հարաբերությունները սիոնիստաական ռեժիմի հետ` չնայած այն ռազմական հանցագործություններին, որ կատարում են բռնազավթիչները Գազայի հատվածում: Իսլամական տենդենցների ավելացումը թուրքական քաղաքականության մեջ չի բերել այդ ոլորտում զգալի փոփոխությունների»:
