Այսօր օրենսդիրը մերժել է ՀՅԴ ներկայացրած «Գիտության ոլորտին առնչվող փոփոխությունների ծրագիրը»: Օրինագծի մերժումից անմիջապես հետո այսօր ասուլիս տվեցին ՀՅԴ պատգամվոր Ռուզան Առաքելյանը և ՀՀԿ պատգամավոր Կարինե Աճեմյանը: Դաշնակցական պատգամավորը կարևորում է գիտության ոլորտում բարեփոխումներ կատարելը, քանզի դա ազգային անվտանգության խնդիր է. «Եթե մենք մեր երկրի ապագան տեսնում ենք գիտության մեջ, ապա պիտի ոլորտը խթանող միջոցառումներ ձեռնարկենք»,- համոզված է Ռ. Առաքելյանը: Մինչդեռ գիտաշխատողների աշխատավարձը 2011 թ. պետբյուջեի պլանով կազմելու է 55.000-60.000 դրամ: « Պատահական չէ, որ երիտասարդ գիտաշխատողները լքում են երկիրը։ Վերջին 10 տարում գիտաշխատողների թիվը 28000-ից կրճատվել է՝ հասնելով 7.800-ի»,- ասաց Ռ. Առաքելյանը: ՀՀԿ պատգամավոր Կ. Աճեմյանը օրինագծի մերժումը բացատրում է հետևյալ կերպ. «Կան նաև նվիրյալ բժիշկներ, մշակույթի և սպոտի ոլորտի աշխատակիցներ, անհրաժեշտ է նաև նրանց աշխատավարձը բարձրացնել: Իսկ այդքան մեծ բյուջե մենք չունենք»: Ասուլիսի ավարտին Ռ. Առաքելյանը հիշեցրեց. «2000 թ. ընդունվել է գիտության ոլորտում բարեփոխումներ կատարելու մասին օրենք, որը մինչ այժմ Կառավարությունը չի իրականացրել»:
