Ինչպես այսօր հայտնում են իսրայելական կայքերը՝ հղում անելով թուրքական Hurriyet թերթին, Թուրքիայի և Իսրայելի միջև բանակցությունները, որոնք կայացել են նախօրեին, հաջողությամբ չեն պսակվել: Ինչպես հայտնի է դարձել, այդ բանակցությունները տեղի էին ունենում թուրք և իսրայելցի բարձրաստիճան պաշտոնյաների միջև: Իսրայելը շարունակում է Թուրքիայից ներողություն պահանջել «Գազայի հատվածում իրագործված գազանություններ» խոսքի համար, իսկ Թուրքիան իր հերթին ասում է, որ Իսրայելն ինքը պետք է ներողություն խնդրի «Խաղաղության նավատորմի» դեպքերի համար:
Թուրքական կողմը նշում է, որ «դուռը շարունակում է բաց մնալ», անհրաժեշտ է միայն ներողություն խնդրել: Բարձրաստիճան իսրայելցի մի պաշտոնյա նշում է, որ ամբողջ խնդիրը եզրութաբանությունն է. անհրաժեշտ է գտնել այն բառը, որը երկկողմ բանակցություններում կփոխարինի «ներողություն» եզրույթին:
Բացի այդ, Reuters գործակալությունը հայտնել է, որ Իսրայելը անցած հանգստյան օրերին Ժնևում իսրայելցի և թուրք դիվանագետների միջև կայացած բանակցությունների ժամանակ առաջարկել փոխհատուցում «Խաղաղության նավատորմի» դեպքերի ժամանակ զոհված թուրքերի ընտանիքներին:
«Մենք արել ենք մեր առաջարկությունը փոխհատուցման վերաբերյալ և թուրքական կողմին խնդրել ենք ամեն ինչ անել իրավական խնդիրների լուծման համար: Մենք նաև ցանկանում ենք, որ թուրքական կողմը դեսպանին վերադարձնի Իսրայել և թույլ տա՝ մենք էլ մեր դեսպանին վերադարձնենք Անկարա»,- ասել է իսրայելցի պաշտոնյան: