«Ժամանակավորապես անաշխատունակ ճանաչված կանաց» նախաձեռնող խմբի հրավիրած մամուլի ասուլիսին «Ժառանգություն» խմբակցության ԱԺ պատգամավոր Զարուհի Փոտանջյանը ևս մեկ անգամ նկատեց, որ «ժառանգությունը» դեմ է արտահայտվել այդ օրենքի նախագծին և շրջանառության մեջ դրել օրենքի նոր նախագիծ, որով պահանջում են վերականգնել նախկին օրենքը: Սակայն դրա համար, նրա խոսքերով, համատեղ ուժերով է պետք պայքարել: «Այս օրենքը հակասում է ՀՀ Սահմանադրությանը և միջազգային պարտավորություններին, որոնք հանձն ենք առել: Հետևաբար, այս օրենքը վիճարկելու ենք դատական կարգով, և մեր ընկեր փաստաբանները կաջակցեն բոլոր այն կանանց, ովքեր ցանկանում են պայքարել դատական կարգով»,- նշեց Զարուհի Փոտանջյանը և մեջբերեց սոցիալական խարտիայի 8-րդ հոդվածը , որի համաձայն՝ պետությունը պարտավոր է հղի կանանց ապահովել 14 շաբաթվա վճարվող արձակուրդով երեխայի ծնունդից առաջ և հետո: Իսկ ՀՀ աշխատանքային օրենսգրքով՝ հղի կինը 140 օր վճարվող արձակուրդի իրավունք ունի: Այնինչ, ՀՀ կառավարությունը, անտեսելով այս պահանջները, հղի կանանց աշխատավարձը պատրաստավում է նվազեցնել: «Կառավարությունը փորձում է այդ գումարների հաշվին համալրել բյուջեն՝ պատճառաբանելով, թե ցանկանումէ պայքարել խարդախության դեմ: Այնինչ, ինքն է, օրենքը խարդախ ճանապարհով փոփոխելով, ցանկանում տիրանալ այդ գումարներին: Այսօր մեր հասարակությունը ծերացման խնդիր ունի, իսկ այս կերպ հարվածում են ծնելիությանը: Միայն ծնելիությանը նպաստելու, կրթված մայրեր ունենալու համար նորմալ երկրներում մեկ տարի են կանաց վարձատրում»,-նկատեց Զարուհի Փոստանջյանը և ևս մեկ անգամ լրացրեց, որ այս օրենքի դեմ համատեղ ուժերով է պետք պայքարել: