Մամուլի տարածած տեղեկությունների համաձայն` ԵԽ Մարդու իրավունքների գլխավոր հանձնակատար Թոմաս Համարբերգի` Հայաստան կատարելիք այցի ժամկետները հստակեցվել են, և գլխավոր հանձնակատարը Հայաստան պետք է այցելի 2011 թ. հունվարի 18-ին: «Առաջին լրատվականը» «Իրավունքի և ազատության» կենտրոնի ղեկավար, իրավապաշտպան Վարդան Հարությունյանից հետաքրքրվեց, թե Թոմաս Համարբերգի առաջիկա այցը և ԱԺ ՀՀԿ պատգամավոր Ռազմիկ Զոհրաբյանի հայտարարությունը, թե ՀՀ քրեական օրենսգրքում նախատեսված են փոփոխություններ, համաձայն որոնց`պետք է լինի մեղմացում , և ազատ արձակվեն մի շարք կալանավորներ, չի՞ նշանակում արդյոք, որ մինչև հունվար կարող են ազատ արձակվել բոլոր քաղբանտարկյալները: «Բոլորի մասին ոչինչ ասել չեմ կարող, բայց որ զարգացումները կարող են հանգեցնել նրան, որ քաղբանտարկյալներն ազատ են արձակվելու, ես վստահ եմ: Ընդհանրապես կալանավորների նկատմամբ մեղմացումը, Քրեական օրենսգրքում փոփոխությունները պարտադիր պետք է լինեն, որովհետև մեր օրենսդրությունը չափազանց խիստ է: Մարդիկ, որոնք ձերբակալվում կամ դատապարտվում են, ապրում են անմարդկային պայմաններում: Պետք է ամեն ինչ արվի, որպեսզի մարդիկ հնարավորինս շատ, հնարավորինս շուտ և արագ ազատ արձակվեն կալանավայրերից: Դա վերաբերում է ոչ միայն քաղբանտարկյալներին, այլև` հենց քրեական աշխարհի ներկայացուցիչներին: Նախ` չափից դուրս ծանրաբեռնված են մեկուսարանները, և երկրորդ` այնտեղ հայտնվել են մարդիկ, որոնք չպետք է լինեին մեկուսարաններում»,- մեր զրույցի ժամանակ նշեց Վարդան Հարությունյանը: «Առաջին լրատվականը» հետաքրքրվեց նաև, թե հնարավո՞ր չէ, որ իշխանություններն ազատ արձակեն մի քանի քաղբանտարկյալների ու ևս մի քանի այլ կալանավորվածների` այդպիսով եվրոպական կառույցների աչքին «թոզ փչելով», որ բոլոր քաղբանտարկյալներին ազատ են արձակել: Վարդան Հարությունյանը նկատեց, որ հենց եվրոպական կառույցները թեև չեն օգտագործում «քաղբանտարկյալ» տերմինը, բայց փոխարենը նրանց մասին հայտարարություններում նշում են. «քաղաքական հայացքների համար կալանավորված անձինք»: Իրավապաշտպանն ասաց նաև, որ տասնմեկ քաղբանտարկյալների ցուցակը դրված է նաև եվրոպական կառույցների սեղանին, և նրանք շատ լավ գիտեն, թե ովքեր են քաղբանտարկյալները: «Բացառվում է, որ գողության համար դատապարտվածին ազատ արձակեն և ներկայացնեն, որ նա քաղբանտարկյալ է»,- ասաց Վարդան Հարությունյանը: «Առաջին լրատվականին» հետաքրքրում էր, թե մի խումբ ԳԱԱ ակադեմիկոսների և ստեղծագործական միությունների նախագահների հայտարարությունները` ի պաշտպանություն քաղբանտարկյալ Նիկոլ Փաշինյանի, կանխատեսելի՞ քայլ էր: Արդյո՞ք նրանք կարող էին հանդես գալ նման հայտարարությամբ առանց իշխանությունների համաձայնության, երբ նախկինում երբեք այդպիսի նախաձեռնություն չեն ցուցաբերել և չեն ընդվզել իշխանությունների ապօրինի գործողությունների դեմ: «Ես չեմ կարծում, որ նրանք իշխանությունների հետ համաձայնեցրել են իրենց այդ քայլը: Հայտարարությունը վերաբերում է Նիկոլ Փաշինյանի ֆիզիկական անվտանգության ապահովմանը: Երբ խոսքը մարդու կյանքին և առողջությանն է վերաբերում, տարբեր մարդիկ կարող են արձագանքել: Այդ մարդիկ ստորագրել են` տեղյակ լինելով Նիկոլ Փաշինյանի կյանքին սպառնացող վտանգի մասին: Իշխանության «մատը» ես այստեղ չեմ տեսնում»,- ասաց Վարդան Հարությունյանը:
