«Այսօր ունենք լավ նվագախումբ, բայց վերջին ռեսուրսների հիմքի վրա: Մարդիկ գնում են նվագախմբից: Մի քանի օրից անվերադարձ ԱՄՆ կմեկնի մեր երաժշտներից մեկը». լրագրողների հետ զրույցում ահազանգ հնչեցրեց Հայաստանի պետական ֆիլհարմոնիկ նվագախմբի գեղարվեստական ղեկավար և դիրիժոր Էդուարդ Թոփչյանը։
«Բացարձակապես չունենք աճող սերունդ: Դա է ամենասարսափելին: 1990-ականներին երկրի վիճակը ավելի վատ էր, բայց այն ժամանակ ունեինք անընդհատ պատրաստվող երիտասարդ կադրեր, որոք գալիս էին մեկը մյուսին փոխարինելու»,- նշեց նա` նկատելով, որ հիմա նրանցից շատերը զարդարում են եվրոպական տարբեր բեմեր:
Նրա խոսքով` երբ ինքը 10 տարի առաջ էր ահազանգում կադրերի հետագա պակասի մասին, իրեն ասում էին` Թոփչյանը վատատես է: «Այսօր չկան երիտասարդ ուժեր, որ վաղը լավ են նվագելու: Ֆոկուս չէ, որ փայտիկի մի հարվածով խփենք, ու առաջանան Նարեկ Հախնազարյաններ և Ալեքսանդր Չաուշյաններ: Եթե հիմա կորցնենք այս ամենը, շատ դժվար կլինի հետո դա վերականգնելը»,- մտահոգ ասաց դիրիժորը` հավելելով, որ դա տասնյակ տարիներ է պահանջում: Վառ օրինակը, ըստ նրա, Իրանն ու Դուբայն են, որոնք, չնայած ահռելի դրամական միջոցներին, այնպես էլ չեն կարողանում ունենալ սիմֆոնիկ նվագախմբեր:
«Պետք է հստակ որոշել` ի՞նչ է պետք անել վաղը: Վաղը կկորցնենք: Էլ չեմ ասում վաղը չէ մյուս օրվա մասին, որն էլ չի լինի»,- հավելեց Է. Թոփչյանը` նկատելով, որ ելքը երաժշտական դպրոցներին ուշադրություն դարձնելն ու 6 տարեկանից սկսած` երեխաների հետ աշխատելն է, որ 8 տարի հետո ունենանք այն սերունդը, որի պակասն այսօր խիստ զգալի է: