Հայ հեղափոխական Դաշնակցության Բյուրոյի անդամ Վահան Հովհաննիսյանը, այսօր խոսելով Ռուսաստանում տեղի ունեցած իրադարձության մասին, երբ Մեդվեդևը հայտարարեց 2012 թվականի նախագահի ընտրությունը Պուտինին զիջելու մասին, հայտարարել է, որ Ռուսաստանում անթույլատրելի բան է տեղի ունեցել. «Այն , ինչ տեղի է ունեցել Ռուսաստանում, ռուսական ընդդիմադիր շրջանակները համարում են անթույլատրելի, քանի որ նախագահից նախկին նախագահին իշխանություն է փոխանցվել, և հասարակության կարծիքը մղվում է երկրորդ պլան: Եթե անկեղծ լինենք, Հայաստանում էլ նման բան եղել է»:
Ռուսաստանը մի կողմ, թող այնտեղ իրենք որոշեն, ինչն է թույլատրելի կամ անթույլատրելի: Հետաքրքիր է, թե Հայաստանում ինչ է տեղի ունեցել, որ հիշատակում է Վահան Հովհաննիսյանը: Հատկապես ո՞ր դրվագը նկատի ունի նա, երբ ասում է, որ Հայաստանում էլ տեղի է ունեցել «նախագահից նախկին նախագահին իշխանության փոխանցում»: Հայաստանում կարծես թե այդպիսի իրավիճակ չի եղել: Երկու անգամ է իշխանություն փոխանցվել` Լևոն Տեր-Պետրոսյանն է իշխանությունից հեռացել 2008 թվականին, ընդ որում ամենևին չասելով, թե ում է փոխանցում իշխանությունը, և հեռացել է Ռոբերտ Քոչարյանը, իշխանությունը փոխանցելով Սերժ Սարգսյանին: Ո՞ր դեպքը նկատի ունի Վահան Հովհաննիսյանը: Ամենայն հավանականությամբ՝ երկրորդը, որովհետև հենց այդ դեպքից հետո է Դաշնակցությունը հայտնվել բավական անհարմար վիճակում:
1998 թվականից հետո «իրադրության փոփոխության» արդյունքում Վահան Հովհաննիսյանը և ընկերները բանտից հայտնվեցին ազատության մեջ, իսկ հետո նաև դարձան իշխանության փաստական մաս: Այնպես որ, հազիվ թե ՀՅԴ-ն այդ պահը հիշեր որպես «անթույլատրելի» բան, այլապես ստացվում է, որ ՀՅԴ-ն նաև անթույլատրելի է համարում իր բանտից դուրս գալը: Հավանական է, որ Վահան Հովհաննիսյանը նկատի ունի Հայաստանում 2008 թվականի իշխանության փոխանցումը, քանի որ հենց դրանից հետո Դաշնակցությունը մի տեսակ միջանկյալ վիճակում մնաց:
Իհարկե Սերժ Սարգսյանը կոալիցիա կնքեց դաշնակների հետ, սակայն իր գործունեությամբ նրանց հանդեպ դրսևորեց բացարձակ արհամարհանք, ստորագրեց հայ-թուրքական արձանագրությունները, իսկ երբ ՀՅԴ-ն դրանց պատճառով դուրս եկավ կոալիցիայից, Սերժ Սարգսյանը կտրուկ փոփոխված մարտավարությամբ սկսեց պահանջատեր լինել Թուրքիայի հանդեպ և այդպիսով խլեց ՀՅԴ հացը նաև ընդդիմության դաշտում: Բնական է, որ թե՛ իշխանությունից, թե՛ ընդդիմությունից ձեռնունայն մնացած ՀՅԴ-ն պետք է այդ զարգացումների սկզբնաղբյուր հանդիսացած իշխանափոխանցումը համարի «անթույլատրելի»: Հետաքրքիր է միայն, թե ինչու ՀՅԴ-ն այդ մասին չէր հայտարարում այն ժամանակ, երբ Ռոբերտ Քոչարյանը կատարում էր փոխանցումը, ընդ որում՝ «խաղի կանոնների», մեղմ ասած, կոպիտ խախտումներով: Ըստ երևույթին, այդ ժամանակ Վահան Հովհաննիսյանը և ՀՅԴ-ն սպասում էին, որ փոխանցումը Սերժ Սարգսյանին է հասնելու Դաշնակցությամբ տարանցված, և նախագահի թեկնածու Վահան Հովհաննիսյանը լինելու է երկրորդը և երկրորդ փուլում պատվաբեր և շահութաբեր պարտություն է կրելու Սերժ Սարգսյանից: Բայց իրադարձությունները բոլորովին այլ սցենարով զարգացան, և իշխանության քոչարյանական փոխանցումը ՀՅԴ-ին դրեց թե՛ բարոյապես, թե՛ զուտ քաղաքական առումով անհարմար դրության մեջ, ինչն էլ հեռակա կարգով անթույլատրելի է դարձրել այն, ինչ տեղի ունեցավ 2008 թվականին, թեև, անշուշտ, միայն իշխանությունը Սերժ Սարգսյանին փոխանցելու մասով ՝ անթույլատրելի: