Eastman Kodak ընկերության բաժնետոմսերի արժեքը սեպտեմբերի 26-ին բորսաների փակման ժամանակ ընկել է 27%-ով` հասնելով 1.74 դոլարի: Ինչպես նշում է Reuters գործակալությունը, Kodak-ի բաժնետոմսերի գինն այդքան ցածր եղել է 38 տարի առաջ: The Financial Times թերթը գրում է, որ այս տարվա սկզբից ընկերության թանկարժեք թղթերը կորցրել են իրենց արժեքի 70%-ը:
Այս տարվա անկումը կապված է նրա հետ, որ ընկերությունը մտադիր է 160 մլն դոլարի պարտք վերցնել: Միևնույն ժամանակ, ընկերությունում նշել են, որ այդ գումարները կուղղվեն «ընդհանուր կորպորատիվ նպատակներին»: Համեմատության համար նշենք, որ 1997թ. Kodak-ի յուրաքանչյուր բաժնետոմս արժեր 90 դոլար, սակայն այդ թվականից ի վեր դրանք էժանանում են: 2007թվից ընկերությունը, որի կապիտալիզացիան ներկա պահին կազմում է 468մլն դոլար, եկամուտ չի ստացել:Այս ամենը թերևս կապված է թվային տեսախցիկների շուկայի զարգացման հետ, որում Kodak-ն այդպես էլ չկարողացավ մրցակցություն ապահովել:
Kodak-ը հիմնադրվել է 1892թ.: 2010թ. ընկերությունն ունեցել է 687 մլն դոլարի պարտք: