Ինչպես հայտնում է Грузия Online-ը, Վրաստանի նախագահի մամլո ծառայությունը հաղորդագրություն է տարածել, որում փաստել է, որ Վրաստանին աջակցության հարցը ԵԱՀԿ գագաթնաժողովի երկրորդ օրը պահպանվել է: Հաղորդագրության մեջ ներկայացվել են պետությունների առաջնորդների գնահատականները տարածաշրջանում ձգձգվող հակամարտությունների և Վրաստանում ԵԱՀԿ առաքելության գործունեության վերականգնման վերաբերյալ. «Չնայած բազմաթիվ փորձերին, ձգձգվող հակամարտությունները նախկինի պես մնում են չլուծված: Թուրքիան ջանքեր է գործադրելու Վրաստանի, Ադրբեջանի և Մոլդովայի հակամարտությունների կարգավորման հարցում, և այդ ջանքերը հիմնվելու են երկրների ինքնիշխանության և տարածքային ամբողջականության հիմքի վրա»,- նշել է Թուրքիայի նախագահ Ա.Գյուլը:
Լատվիայի նախագահ Դալիյա Գրիբաուսկայտեն նշել է, որ ձգձվող հակամարտությունները բավական զգայուն են: Նա վստահեցրել է, որ ԵԱՀԿ-ն կարող է լուծել Վրաստանի և Մոլդովայի սառեցված հակամարտությունները:
Ըստ Վրաստանի նախագահի մամլո ծառայության հաղորդագրության` Բելառուսի նախագահ Ալեքսանդր Լուկաշենկոն հայտարարել է, որ աշխարհը սպառնալիքների առջև է, ընդ որում՝ նա նկատել է, որ Եվրոպայի աշխարհաքաղաքական դասավորությունը սկզբունքորեն փոխվել է: «Հուսով եմ, որ այս գագաթնաժողովում կընդունվեն կոնկրետ որոշումներ, սակայն որքան էլ մենք խոսենք մեր աշխատանքի կարևորության մասին, ցավոք, այժմ ոչինչ չենք կարող ամրագրել» ,- ասել է նա:
Վրաստանին աջակցող հայտարարություններով են հանդես եկել Խորվաթիայի նախագահը, Էստոնիայի վարչապետը, Ավստրալիայի ԱԳ նախարարը և ԵԱՀԿ-ում Լեհաստանի դեսպանը,- հայտնում է Վրաստանի նախագահի մամլո ծառայությունը: