Գրեթե կասկած չկա, որ Ռոբերտ Քոչարյանի դռանը ներկայումս բավական մեծ հերթ է կուտակվելու` քաղաքական մարգինալների հերթ, որոնք ներքաղաքական վերջին շրջանի զարգացումներից դուրս մնացին՝ մերժվելով թե՛ Տեր-Պետրոսյանի, թե՛ Սերժ Սարգսյանի կողմից: Պուտինի վերադարձի ֆոնին Ռոբերտ Քոչարյանի վերադարձի հոսանքը, որ անկասկած մտել է Հայաստանի ներքաղաքական դաշտի շրջանառության մեջ և ակտիվանալու է առաջիկայում, հաստատ նոր հույսեր է ներշնչել անպետքության զգացումով ներշնչված մարգինալներին, որոնք չկարողացան որևէ կերպ տեղավորվել ընդդիմության շարքերում, իսկ իշխանությունն էլ նրանց օգտագործեց էլ ավելի վարկաբեկելու համար և, այսպես ասած, ձեռքերը մաքրելու ՙլաթի՚ տեղ բանացրեց:
Ռոբերտ Քոչարյանը հիմա նրանց համար հույս է, որից անպայման կառչելու են հնարավորինս ամուր և երկար, եթե, իհարկե, Քոչարյանը դիմի նրանց օգնությանը կամ որոշի օգտագործել նրանց: Իսկ Քոչարյանը, ամենայն հավանականությամբ, կորոշի անել այդ բանը՝ նրանց պատվիրելով կոշտ և անխնա քննադատության ենթարկել միաժամանակ Լևոն Տեր-Պետրոսյանին և Սերժ Սարգսյանին: Թե ովքեր կլինեն հատկապես այդ մարգինալ ուժերը՝ շատ մոտ ապագայում կերևա Քոչարյանի հնարավոր վերադարձի և ակտիվության մասին անդրադարձերից: Ակնհայտ է, որ Ռոբերտ Քոչարյանի համար էլ այդ ուժերը չեն կարող որևէ կերպ ինչ-որ ավելի առարկայական ծառայություն մատուցել, և նա էլ, անկասկած, ընդամենը ՙսև գործն՚ է հանձնարարելու նրանց:
Հավանաբար, նրանց միջոցով փորձ կարվի շրջանառության մեջ դնել որոշակի, այսպես ասած, կոմպրոմատային տեղեկատվություն, ինչը կարող է լինել Ռոբերտ Քոչարյանի գլխավոր խաղաքարտերից մեկը: Այդպիսով, առաջիկայում հավանաբար Հայաստանի ներքաղաքական դաշտ է լցվելու ՙսևագործ բանվորների՚ մի հոծ բազմություն, որոնք առանց այդ էլ դաշտում էին, բայց քանի որ գործ չունեին` մայթեզրին նստած էին: Հիմա նրանց համար հայտնվել է պոտենցիալ գործատու, և կասկած չկա, որ նրանք հերթ են կանգնելու Քոչարյանի դռանը, ու նաև կասկած չկա, որ ամեն մեկը մի-մի աշխատանք կստանա: Բայց դա վատ էլ չէ, իհարկե, եթե քաղաքական դաշտի շաբաթօրյակ մի քիչ էլ Ռոբերտ Քոչարյանն իրականացնի` կամա թե ակամա: Որովհետև այդ ուժերը, ոտքի տակ ընկած լինելով, ավելի էին ջուր պղտորելու, քան այն դեպքում, երբ Քոչարյանը հավաքում է դրանց ու հանձնարարություններ տալիս, և հայտնի է դառնում դրանց գոյության իմաստը, քանի որ այդպես առավել պարզ է դառնալու նրանց արածի և գոյության անիմաստությունը:
