Սերժ Սարգսյանն այսօր մեկնում է Միացյալ Նահանգներ: Այնտեղ մասնակցելու է ՄԱԿ-ի Գլխավոր ասամբլեայի նստաշրջանին, որից հետո Նյու Յորքում և Լոս Անջելեսում ընդունելություններ են լինելու Հայաստանի անկախության 20-ամյակի կապակցությամբ, իսկ Լոս Անջելեսում բացվելու է նաև Հայաստանի հյուպատոսությունը: ԱՄՆ իշխանության ներկայացուցիչների հետ հանդիպումների մասին պաշտոնական տեղեկություն չկա, սակայն, ամենայն հավանականությամբ, կլինեն այդպիսի շփումներ, թեկուզ` ոչ հրապարակային մակարդակով, կամ թեկուզ` միջնորդավորված:
ԱՄՆ-ից հետո Սերժ Սարգսյանը մեկնելու է Ֆրանսիա, որտեղ արդեն պաշտոնական հանդիպումներ է ունենալու Ֆրանսիայի իշխանության բարձրագույն ներկայացուցիչների հետ: Այս այցելություն-տուրնեն բավական հետաքրքրական է: Նախևառաջ այն առումով, որ Սերժ Սարգսյանը հենց այդպիսի մի տուրնե իրականացրեց 2007 թվականի հոկտեմբերին, երբ նախ այցելեց ԱՄՆ, իսկ հետո Ֆրանսիա: Հետաքրքրականն այստեղ այն է, որ նրա այդ այցը տեղի էր ունենում Հայաստանի համար իսկապես կարևոր ներքաղաքական իրավիճակում, երբ տեղի էին ունենում նշանակալի իրադարձություններ` Տեր-Պետրոսյանը հայտարարել էր ակտիվ քաղաքականություն վերադառնալու մասին և արդեն պատրաստվում էր հոկտեմբերի 26-ի իր առաջին հանրահավաքին, որի իրազեկման ժամանակ էլ տեղի ունեցան առաջին ընդհարումները ոստիկանության և իր կողմնակիցների միջև, որոնց Տեր-Պետրոսյանը ոստիկանությունից ազատեց անձամբ այնտեղ ներկայանալով և դնելով ազատման պահանջ, հակառակ դեպքում սպառնալով չհեռանալ ոստիկանությունից:
Ահա իրադարձությունների և ներքաղաքական լուրջ գործընթացների հասունացման այդ ժամանակահատվածում Սերժ Սարգսյանը գտնվում էր ԱՄՆ-ից Ֆրանսիա գնալու ճանապարհին: Եվ հիմա էլ, Հայաստանում իսկապես հետաքրքրական ներքաղաքական իրավիճակ է: Տեր-Պետրոսյանը կրկին պատրաստվում է հանրահավաքի, ու Սերժ Սարգսյանը կրկին մեկնում է ԱՄն և Ֆրանսիա, իսկ առջևում կրկին ներքաղաքական հետաքրքրական զարգացումներ են, նախընտրական փուլ, որի մեջ արդեն իսկ մտել ենք դե ֆակտո: Ահա այդ իմաստով 2007 և 20011 թվականների աշունների նմանությունը բավական հետաքրքրական է: Հարցն այն է, թե արդյո՞ք պատմությունը կրկնվելու է: Արդյո՞ք մենք դարձ ենք կատարելու ի շրջանս յուր, թե՞ պարզապես այս անգամ արդեն զարգացումները տեղի են ունենալու` 2007-ի բացթողումները, սխալներն ու վրիպումները հաշվի առնելով, ընդ որում` ներառյալ ԱՄն և Ֆրանսիա Սերժ Սարգսյանի կատարած այցի և դրա արդյունքների մասը: