Հայաստանի ազգային պատկերասրահի տնօրեն, գեղանկարիչ Փարավոն Միրզոյանն այսօր խոսեց պատկերասրահի 2010 թվականի գործունեության, միջոցառումների, ցուցահանդեսների և 2011 թ. սպասվող նորությունների մասին:
2010 թ. ազգային պատկերասրահի համար շատ լեցուն տարի էր: Կազմակերպվել է երկու կարևոր ցուցահանդես, որոնցից առաջինը՝ դեռ 2009 թ. Պուշկինյան թանգարանում, որտեղ ցուցադրվեցին հայ և ռուս կերպարվեստի գլուխգործոցները: «Ասեմ, որ դա երևույթ էր, որովհետև նման ցուցահանդես Ռուսաստանի մայրաքաղաքում առաջին անգամ էր կազմակերպվում, ցուցահանդեսը շատ կարևոր և իմաստալից էր երկու երկրների, երկու ժողովուրդների համար: Մյուս կարևոր և նշանակալից ցուցահանդեսը Սուրենյանցի ամբողջական ցուցադրությունն էր` 200-ից ավելի աշխատանքներով»,- նշեց պարոն Միրզոյանը:
Ողջ տարվա ընթացքում պատկերասրահում կազմակերպվել են նաև հոբելյանական ցուցահանդեսներ, միջոցառումներ և դեռ սպասվում են: 2011 թ. ազգային պատկերասրահի դռները բաց կլինեն սյուռեալիզմի սիրահարների և գիտակների համար: Ինչպես նշեց պատկերասրահի տնօրենը, ցուցադրությունը, ամենայն հավանականությամբ, կբացվի մայիս ամսին:
