«Դպրոցներում տղամարդկանց բացակայությունը լուրջ խնդիր է հասարակության առողջ զարգացման և տղամարդու ու կնոջ դերերի ճիշտ բաշխման համար»,- համոզված է հոգեբան Արմեն Այվազյանը:
Հատկապես այս պատճառով է հայկական դպրոցներում արական սեռի ներկայացուցիչ ուսուցիչների սակավությունն անհանգստացնում Երևանի քացաքապետարանի կրթության վարչության պետ Սիլվա Աչոյանին. «Տղամարդ ուսուցչի ներկայությունը դպրոցում նույնքան պարտադիր է, որքան հոր ներկայությունն ընտանիքում: Չէ՞ որ դեռահասության տարիքում տղաներն այնպիսի խնդիրների են առնչվում, որոնց լուծման գործում տղամարդը պետք է ուղղություն տա»,- «Առաջին լրատվական»-ի լրագրողի հետ զրույցում նշեց վարչության պետը:
Դպրոցներում տղամարդ ուսուցիչների բացակայության պատճառով հայ տղաներն այսօր սխալ դաստիարակություն են ստանում: Հոգեբանի Արմեն Այվազյանի խոսքով` դաստիարակության գործընթացում զրկված լինելով տղամարդու ազդեցությունից` աշակերտները, հատկապես տղաները, կենսաբանական և հոգեբանական զարգացման ոչ բնականոն կողմնորոշում են ստանում: «Եթե դպրոցում տղամարդ չկա, բնականաբար, տղա աշակերտների համար վարքագծի համապատասխան մոդել էլ չի կարող լինել: Իսկ այս պարագայում տղան իր բնավորությամբ, հատկանիշներով, աշխարհայացքով ձևավորվելիս անկախ իր կամքից բնավորության մեջ կամ նույնիսկ շարժուձևում սկսում է կրկնօրինակել իրեն շրջապատող կանանց` բազմակի թաքնված դրսևորումներով»,-նշում է հոգեբանը: