Ինչպես հաղորդում է թուրքական Today’s Zaman-ը, Թուրքիայի արտաքին գործերի նախարար Ահմեդ Դավութօղլուն երեքշաբթի ԱՄՆ կոնգրեսմենների հետ քննարկել է 1915 թ. Հայոց ցեղասպանության վերաբերյալ բանաձևը և Իսրայելի հետ հարաբերությունները:
Նա հանդիպել է Սենատի Եվրոպական հարաբերությունների ենթահանձնաժողովի ղեկավար Ջին Շահինին, ԱՄՆ Սենատի արտաքին հարաբերությունների հանձնաժողովի նախագահ Ջոն Քերրիին, ինչպես նաև Սթեյն Հոյերին, Ռիչարդ Լուգարին, Հովարդ Մերմանին:
Դիվանագիտական աղբյուրները նշում են, որ Դավութօղլուն քննարկել է Թուրքիայի արտաքին քաղաքականության մի շարք կարևոր խնդիրներ, այդ թվում՝ թուրք-իսրայելական հարաբերությունները:
Նա վերահաստատել է, որ Թուրքիան ակնկալում է Իսրայելի ներողությունը «Մավի Մարմարա» նավի հետ տեղի ունեցածի կապակցությամբ՝ նշելով, որ իսրայելական հարձակումը միջազգային օրենքների խախտում է, և որ Թուրքիան համագործակցել է ՄԱԿ-ի համապատասխան հանձնաժողովի հետ այդ հարցի կապակցությամբ: Դավութօղլուն նաև լսել է ԱՄՆ Սենատի և Ներկայացուցիչների պալատի անդամների տեսակետները տարբեր հարցերի շուրջ:
Դավութօղլուն քննարկել է նաև անցած մարտին Ներկայացուցիչների պալատի արտաքին հարաբերությունների հանձնաժողովում ընդունված բանաձևը, որը վերաբերում էր 1915 թ. Հայոց ցեղասպնությանը (թերթում նշվում է 1915 թ. դեպքեր): Նախարարն ասել է, որ բանաձևը կարող է վտանգել թուրք-ամերիկյան հարաբերությունները, և կրկնել է Թուրքիա դիրքորոշումը այս դեպքերը քննելու վերաբերյալ:
