ԱԺ ՀՀԿ խմբակցության պատգամավոր Ռաֆիկ Պետրոսյանը, պատասխանելով լրագրողների հարցերին, նշեց, որ ինքը Նոր Նորքում մասնակցել է ընտրությունների և ականատես եղել, թե ինչպես է «Ժառանգություն» կուսակցությունը խախտումներ արել, փորձել լցոնումներ անել, փող բաժանել: Ըստ Ռաֆիկ Պետրոսյանի` ինքը, տեսնելով «Ժառանգություն» կուսակցության խախտումները, բազմիցս ահազանգել է ԱԱԾ-ին և իրազեկել խախտումների մասին: «Առաջին լրատվականը» նկատեց, որ ՀՀ «Ընտրական օրենսգրքում» ամրագրված է, որ բարեգործությունն արգելված է: Մինչդեռ ակնհայտ է, որ բոլոր հեռուստաընկերություններով ցուցադրվում է, թե ինչպես են վարչական ռեսուրսներ և ֆինանսներ ունեցող երկու կուսակցություններ` ՀՀԿ-ն և «Բարգավաճ Հայաստանը» բարեգործություն անում, մատուցում առողջապահական ծառայություններ սոցիալապես անապահով խավին: Ռաֆիկ Պետրոսյանը մեր այս դիտարկմանն ի պատասխան նշեց, որ բարեգործությունը թույլատրված է, սակայն այն արգելված է նախընտրական փուլում: Ռաֆիկ Պետրոսյանն ասաց, որ այսօրվա մեր հասարակության սոցիալական վիճակը թույլ չի տալիս, որ օրենք ընդունվի ընդհանրապես բարեգործությունն արգելելու մասին: Ռաֆիկ Պետրոսյանը նշեց նաև, որ մեր հասարակությունն ունի մեծամասնական ընտրակարգով ընտրված ԱԺ պատգամավորների կարիք, քանի որ վերջիններս ավելի շատ են զբաղվում իրենց ընտրատարածքի հարցերով:
