Ընտրական օրենսգրքի փոփոխությունների նախագիծը այժմ բուռն քննարկման է
ենթարկվում: Իշխանությունները նշում են, որ սա կատարյալ նախագիծ է և
նվազագույնին է հասցնում ընտրախախտումների հնարավորությունը, ինչպես նաև
նշվում է, որ նախագիծը հավանության է արժանացել միջազգային փորձագետների
կողմից: Ֆրանսիայում գտնվող՝ ԱԺ արտաքին հարաբերությունների հանձնաժողովի նախկին նախագահ, ՀՀՇ վարչության անդամ Հովհաննես Իգիթյանը մեզ հետ զրույցում նկատեց, որ այդ փոփոխությունները պետք է պատասխանեն երկու հարցի, թե արդյո՞ք Հայաստանի հասարակությունը հավատում է ընտրությունների արդյունքներին, և արդյո՞ք հասարակությունը հավատում է, որ ընտրությունների միջոցով հնարավոր է երկրում իշխանություն փոխել. «Այս օրենսդրական փոփոխությունները հենց այդ հարցերի պատասխանները պիտի տան, սակայն մենք տեսնում ենք, որ այն պրոբլեմները, որոնք կային նախկին ընտրությունների ժամանակ, այս օրենսգրքում ևս չեն լուծվում: Ես որևէ առաջընթաց ԸՕ-ի նոր նախագծում չեմ տեսնում, հակառակը` իշխանությունները ցանկանում են կեղծիքները կոծկելու համար օրենսդրական հնարքներ գտնել»:
Իգիթյանի գնահատմամբ, եթե անգամ այսօր վերցնենք ամենաժողովրդավար երկրի ամենալավ օրենքը և կիրառենք Հայաստանում, դա չի գործելու, քանի որ մենք տեսնում ենք, թե իշխանության շուրջ կանգնած կիսակրիմինալ դեմքերը ինչպես են ընտրութուններն անցկացնում, ինչպես են մարդկանց սպառնալիքներով բերում ընտրատեղամաս. «Կարելի է ունենալ լավ օրենք, բայց այն, ինչ մենք տեսել ենք 2008թ., թույլ չի տալիս չմտածելու, որ դա ևս մեկ անգամ չի կրկնվի: Պարզ է, որ այս իշխանությունը վերարտադրվելու համար պետք է օգտագործի բոլոր հնարավոր միջոցները»:
