ԱԺ ՀՀԿ խմբակցության պատգամավոր Կարեն Ավագյանը, անդրադառնալով ամերիկյան փաստաթղթերին, ասաց. «Երևույթն ինքնին անհեթեթություն է. ինչ է նշանակում գաղտնի փաստաթուղթ, ինչ է նշանակում փաստաթղթի բացահայտում և ինչ է նշանակում լրատվական պատերազմական գործողություններ: ՀՀ արտաքին քաղաքականությունը շատ հստակ ու թափանցիկ է եղել բոլոր երկրների` թե՛ ԱՄՆ-ի, թե՛ ՌԴ-ի, թե՛ Իրանի հետ: Որևէ խնդրահարույց քաղաքականություն ՀՀ-ն այս տարիների ընթացքում չի իրականացրել: Նման փաստաթղթեր գոյություն ունենալ չեն կարող»,- նշեց նա: Մեր հարցին, թե ԱՄՆ դեսպանատունն արձագանքել է և չի հերքել այդ փաստաթղթերի գոյությունը, Ավագյանը նշեց. «Բայց չի էլ հաստատել: Ուստի` դա չի նշանակում, որ նման փաստաթուղթ գոյություն ունի: Հակառակ դեպքում ցույց կտային հենց փաստաթուղթը, քանի որ կա արդեն բացահայտված փաստաթուղթ: Գաղտնիության խնդիրը դուրս է եկել արդեն: Այսքանից հետո եթե նման փաստաթուղթ եղել է, կարող են բացահայտել: Իսկ ես կրկնեմ, որ որևէ խնդրահարույց քաղաքականություն ՀՀ-ն չի իրականացրել: Այդ փաստաղթի գոյության մասին լուրերը հորինածին են»,- նշեց նա: