ՀՀ առաջին նախագահ Լևոն Տեր-Պետրոսյանը կիրակի օրը տեղի ունեցած ՀՀՇ երիտթևի համաժողովի ժամանակ ունեցած իր ելույթում անդրադարձավ այն հարցին, թե, ի վերջո, ինչպիսի՞ ընդդիմություն է Կոնգերսը: Առաջին նախագահը նշեց, որ ընդհանրապես շփոթ կա, թե ի՞նչ բան է ընդդիմությունը:
«Շատ պարզ բան է ընդդիմությունը. դա սովորական ժողովրդավարական պետություններին հատուկ ինստիտուտ է, և ես կերազեի, որ մենք էլ լինենք սովորական ժողովրդավարական պետություն, որտեղ, այո, եթե չհասնեինք իշխանության, հանգիստ օրինական ճանապարհով, օրենքների շրջանակում իրականացնեինք մեր առաքելությունը: Իսկ ի՞նչ է այդ առաքելությունը. նորից հսկողության մի մեխանիզմ է, որը թույլ չի տալիս իշխանություններին գնալ կամայականությունների: Բայց ես կարծում եմ, որ իսկապես կա արմատական ընդդիմություն և կա կառուցողական ընդդիմություն: Կառուցողական ընդդիմությունն այն ընդդիմությունն էր, որի մասին քիչ առաջ խոսեցի, այսինքն` օրինական ժողովրդավարական պետության մեջ այն ընդդիմությունը, որը բավարար ձայներ չի հավաքում իշխանություն կազմելու համար, բնականորեն դառնում է ընդդիմություն, և նրա գործունեությունն իսկապես կառուցողական է խորհրդարանում և, եթե մամուլն ու հեռուստատեսությունն ազատ են, բնական է, նաև մամուլում և հեռուստատեսությունում: Արմատական ե՞րբ է դառնում ընդդիմությունը. ստիպված դառնում է այն ժամանակ, երբ որ այդ իշխանությունը լեգիտիմ չէ: Հնարավոր չէ կառուցողական ընդդիմություն ոչ լեգիտիմ իշխանության պայմաններում: Որովհետև այդ դեպքում երկրի գլխավոր խնդիրը դառնում է ոչ լեգիտիմ իշխանությունը լեգիտիմի վերածելու խնդիրը, որին մենք լծվել ենք այս երեք տարի: Այո, մենք արմատական ընդդիմություն ենք, որովհետև չենք ընդունում այսօրվա Հայաստանի գործող ոչ լեգիտիմ իշխանություններին և այդպիսին լինելու ենք այնքան ժամանակ, քանի դեռ մենք այդ խնդիրը ձեզ հետ միասին չենք լուծել»,- հայտարարեց Լևոն Տեր-Պետրոսյանը:
Առաջին նախագահն իր խոսքն ավարտեց երիտասարդներին ուղղված ռեպլիկով, թե մեծերը կաշխատեն այդ բեռը չդնել երիտասարդների վրա: «Կաշխատենք բեռի մեծագույն մասը` 99 %-ը, վերցնել մեզ վրա»,- ասաց ՀՀ առաջին նախագահը:
