ՀՀ գլխավոր դատախազության շենքի առջև ի պաշտպանություն քաղբանտարկյալների կազմակերպվող ուրբաթօրյա ակցիան անցավ «Անսե՛րժ, անռո՛բ Հայաստան», «Ազատությո՛ւն քաղբանտարկյալներին», «Սերժի՛կ մարդասպան» վանկարկումներով: Շուրջ մեկ ժամ տևած ակցիայից հետո, որը վերահսկում էին մեծ թվով ոստիկաններ, հաջորդեց ընդդիմության երթը դեպի ԵԽ հայաստանյան գրասենյակ, որի մոտ ցուցարարները շարունակեցին իրենց վանկարկումները: Նրանք նամակ հանձնեցին ԵԽ հայաստանյան գրասենյակին, որով պահանջում են ապահովել «Հայկական ժամանակ» օրաթերթի գլխավոր խմբագիր Նիկոլ Փաշինյանի անվտանգությունը և ազատ արձակել բոլոր քաղբանտարկյալներին: «Պահանջում ենք միջազգային կառույցներից, և հատկապես ԵԽ-ից, որ հավատարիմ մնան իրենց ընդունած բանաձևերին և հետամուտ լինեն քաղբանտարկյալների ազատ արձակմանը»,- «Առաջին լրատվական»-ի հետ զրույցի ժամանակ նշեց «Իրավունքի և ազատության» կենտրոնի ղեկավար, իրավապաշտպան Վարդան Հարությունյանը: Ըստ իրավապաշտպանի` ԵԽ գրասենյակում նամակի համար շնորհակալություն են հայտնել և խոստացել այն փոխանցել ԵԽ գլխավոր քարտուղար Թյորբյորն Յագլանդին: Վարդան Հարությունյանի ուշադրությունը հրավիրեցինք այն փաստի վրա, որ ԵԽԽՎ հայկական պատվիրակության ղեկավար Դավիթ Հարությունյանը նշել է, որ «քաղբանտարկյալ» տերմինը դարձել է քաղաքական պայքարի, աշխարհաքաղաքական պայքարի ձև, և որ այդ տերմինով մի երկիր ճնշում է գործադրում մեկ այլ երկրի վրա: «Ցանկացած երկիր, որը քաղբանտարկյալներ է պահում, պետք է իմանա, որ դառնում է ամբողջ աշխարհի թշնամին: Ամբողջ աշխարհը, քաղաքակիրթ աշխարհն է թքում իրենց երեսին: Այդ առումով Դավիթ Հարությունյանը ճիշտ է, իրենց մնում է երեսները դեմ տալ»,-ասաց Վարդան Հարությունյանը: