Պատերազմի և խաղաղության լուսաբանման ինստիտուտի կազմակերպած բանակի մասին քննարկման ընթացքում Հելսինկյան քաղաքացիական ասոցացիայի Վանաձորի գրասենյակի ղեկավար Արթուր Սաքունցը կարծիք հայտնեց, որ մեզանում գրեթե բոլորն ոլորտներն են ահավոր վիճակում` կրթությունից սկսած, բանակով վերջացրած. «Այս երկրում համակարգային այնպիսի փտախտ է, որ առանձին ոլորտների մասին խոսելը ճիշտ չէ»:
Արթուր Սաքունցի գնահատմամբ ՀՀ-ում վտանգավոր է դարձել մարդու համար ապրելը: Նրա գնահատմամբ, շատ դեպքեր չեն բացահայտվում, քանի որ հետքերը տանում են շատ կոնկրետ մարդկանց վրա, որոնց «կպչել» չեն կարող: «Սպաները շատ լավ գիտեն, թե գեներալների շրջանում ով է թմրանյութ օգտագործում, բայց չեն բացահայտվում եւ, ցավոք սրտի, դա տարածվում է: Ես մտահոգ եմ, որ իմ գեներալը նարկոման է եւ այդ վիճակում հրաման է տալու կամ հրաման է կատարելու»,- ընդգծեց Սաքունցը եւ հավելեց, որ ավելորդ է խոսել, թե թուրքական, ադրբեջանական կամ այլ բանակներում ինչ է կատարվում: