Վրաստանի փոխվարչապետ, եվրատլանտյան ինտեգրման հարցերով պետնախարար Գիորգի Բարամիձեն, որը երեկ Պրահայում «Ազատություն» ռադիոկայանի հյուրն էր, անդրադառնալով Վրաստանի հայ համայնքի մտահոգություններին առնչվող հարցին, մասնավորապես, որ համայնքի ինտեգրումը չափից դուրս արագ է արվում, ինչից տուժում են հայոց լեզուն ու մշակույթը, ինչպես նաև Վրաստանում Հայ Առաքելական եկեղեցու գրանցման խնդրի մասին, նախ վստահեցրել է, թե Վրաստանը բոլոր դավանանքների ու եկեղեցիների հանդեպ հանդուրժողական քաղաքականություն է վարում։ «Կա՞ արդյոք մի դեպք, որ հայկական եկեղեցին խնդիր է ունեցել իր իրավունքները իրականացնելու գործում։ Կա՞ որևէ խնդիր. երբեք խնդիր չի եղել», – ասել է նա:
Բարամիձեն նշել է, որ Վրաստանում չկա պաշտոնապես գրանցված եկեղեցի կամ դավանանք, որովհետև դրա կարիքը չունեն։ Միայն մեկ սահմանադրական համաձայնություն կա պետության և Վրաստանի եկեղեցու միջև, որը տարանջատում է իրավունքները, և պետությունը պատասխանատվություն է ստանձնում վերադարձնել խորհրդային ժամանակաշրջանում եկեղեցուց բռնագրավված սեփականությունը։ «Սրանից բացի, մենք գրանցված այլ եկեղեցի չունենք», – նշել է նա: Իսկ հարցին, թե ո՞րն է չգրանցելու պատճառը, Վրաստանի փոխվարչապետը պատասխանել է. «Որովհետև խնդիր չկա, դրա կարիքը չկա»։ Նրա պարզաբանմամբ` եկեղեցու գրանցումը կստեղծի ահռելի իրավական տարբեր խնդիրներ, որի կարիքը չունեն. «Ինչի՞ համար. եթե որևէ խնդիր կա, մենք պատրաստ ենք լուծել այն, եթե խնդիր չկա, ինչո՞ւ ստեղծել։ Մենք դա չենք կարող հասկանալ»։
Ինչ վերաբերում է հայ համայնքի ինտեգրումը չափից դուրս արագ կատարելուն, Բարամիձեն նկատել է. – «Մենք տեղյակ ենք մեր որոշ քաղաքացիների մտահոգություններին»։ Նրա խոսքերով, Վրաստանը նորմալ, եվրոպական երկիր է կառուցում, որտեղ յուրաքանչյուր անհատի ու էթնիկ խմբերի իրավունքները հարգվում են։
Գ.Բարամիձեն նշել է, որ Վրաստանում հայկական դպրոցներ կան, «վարդերի հեղափոխությունից» հետո Ախալքալաքում ճանապարհներ են կառուցվում, ներդրումներ են արվում ենթակառույցներում։ Վրաց փոխվարչապետը ընդգծել է, որ Հայաստանի վարորդների համար ևս շատ կարևոր է, որ Վրաստանի ճանապարհներին կոռուպցիա չկա։ «Հայաստանը ապրանքների 80 տոկոսը ստանում է Վրաստանի տարածքով, հայ վարորդների համար հիմա շատ ավելի հեշտ է անցնել Վրաստանի տարածքով: Ավելի ու ավելի շատ հայ զբոսաշրջիկներ են այցելում Վրաստան։ Մենք գերազանց համագործակցություն ունենք կառավարությունների մակարդակով, նախագահների մակարդակով», – շեշտել է Բարամիձեն:
Նկատելով, որ դժվարություններ կան, նա ասել է, որ Ռուսաստանը շատ է փորձում խնդիրներ առաջացնել Հայաստանի ու Վրաստանի միջև, և մի փաստ է մատնանշել. «Ռուսաստանը առաջարկել էր բացել երկու երկրների միջև միակ օրինական անցակետը` Վերին Լարսը։ Վրաստանը համաձայնել էր, բայց հետո Ռուսաստանը ասաց, թե կբացի անցակետը, միայն թե այնտեղով պետք է անցնեն Հայաստանի բեռնատար ավտոմեքենաները` նպատակ ունենալով, որ մենք «ոչ» կասենք, բայց մենք «այո» ասացինք»։
Բարամիձեն նշել է նաև, թե Ռուսաստանը շատ է փորձում լարվածություն սադրել երկու երկրների միջև: Նրա կարծիքով` հայ հասարակությունը ազդեցություն ունի ռուսական մամուլից, որը, իր խոսքերով` թշնամաբար է տրամադրված Վրաստանի հանդեպ։