Facebook սոցիալական ցանցը գնել է Կալիֆոռնիայում գրանցված նորաստեղծ Push Pop Press ընկերությունը, որը զբաղվելու է ինտերակտիվ գրքերի ստեղծմամբ: Այս մասին գրում է The Wall Street Journal-ը: Ինչպես գրում է թերթը, այս ընկերության ամենահայտնի գործը ԱՄՆ նախկին փոխնախագահ Ալբերտ Գորի՝ «Մեր ընտրությունը» գիրքն է, որը հասանելի է սմարթֆոնների և պլանշետային համակարգիչների համար: ԱՄՆ նախկին փոխնախագահի հիշողությունների գրքում տեքստերն ուղեկցվում են շարժվող պատկերներով և երաժշտությամբ:
The Wall Street Journal-ը նշում է, որ թեպետ գործարքի գնի մասին տեղեկություններ չկան, սակայն այս ընկերության հիմնադիրներ Մայք Մաթասն ու Քիմոն Ցինտերիսն ասել են, որ գոհ են ստորագրված պայմանագրից և պատրաստ են իրենց գիտելիքներն ուղղել աշխարհի ամենամեծ գիրքը ստեղծելուն՝ նկատի ունենալով Facebook-ը: Հատկանշական է, որ Մայք Մաթասն ու Քիմոն Ցինտերիսն Apple-ի նախկին աշխատակիցներ են:
Վերջերս ինտերակտիվ գրքերի շուկան սկսել է արագ զարգանալ: Մասնավորապես՝ ամենամեծ աղմուկը հանել է «Ալիսան հեքիաթների աշխարհում» գիրքը, որը դուր է եկել ինչպես ծնողներին, այնպես էլ երեխաներին: