2010 թվականի նոյեմբերի 18-20-ը Կիևում տեղի ունեցած Եվրոպայի երիտասարդության ֆորումի վեհաժողովին մասնակցում էին ԵԵՖ-ին լիիրավ անդամ հանդիսացող 40 եվրոպական երկրներից 72 միջազգային կազմակերպություններ, այդ թվում` Հայաստանի երիտասարդության ազգային խորհուրդը, որը 2004 թվականից ԵԵՖ լիիրավ անդամ է:
«Հենարան» ակումբում այսօր ՀԵԱԽ-ի նախագահ Արամ Սուքիասյանը և գլխավոր քարտուղար Էդուարդ Եղոյանը լուսաբանեցին Ադրբեջանի երիտասարդության ազգային խորհրդի կողմից առաջադրված «Եվրոպական երիտասարդական ֆորումի գլխավոր ասամբլեան հանդես է գալիս Հայաստանի Հանրապետության կողմից Ադրբեջանի Հանրապետության տարածքների օկուպացիայի արդյունքում մարդու իրավունքների կոպիտ ոտնահարման դեմ» բանաձևը, որը օրակարգում է:
«Կոչ էր ուղղվում ԵԱՀԿ Մինսկի խմբին և Անվտանգության խորհրդին` շուտափույթ լուծումներ գտնել Լեռնային Ղարաբաղի, Հայաստանի կողմից օկուպացված տարածքների և շուրջ մեկ միլիոն ադրբեջանցի փախստականների հարցերի վերաբերյալ»,- իր խոսքում նշեց պարոն Սուքիասյանը:
ՀԵԱԽ պատվիրակության համազոր քայլերի, ելույթների, լոբբիստական գործունեության արդյունքում ադրբեջանական կողմը ճնշման ներքո ստիպված է եղել օրակարգից հանել իր իսկ ներկայացրած բանաձևը, քանզի այլընտրանքը կլիներ բանաձևի մերժումը ԵԵՖ-ի կողմից:
ՀԵԱԽ-ի` երկու հոգուց բաղկացած պատվիրակությունն իր միջոցներով է ներկա գտնվել ֆորումին:
«Պետք է ցավ հայտնեմ, որ մեր սպորտի և երիտասարդության նախարարը գուցե լավ չի ընկալում կամ կարևորում ԵԱԽ-ի այսօրինակ քայլերը. մեր համապատասխան ֆինանսավորման հայտը մնաց անարձագանք, այնինչ մի շարք երկրներ ներկայացել էին 5-6- հոգանոց պատվիրակություններով»:
Մեր այն հարցին, թե ինչպես է կազմվում ՀԵԱԽ-ի բյուջեն, և, որ մեր տվյալներով բյուջեն տարեկան բավական պատկառելի գումար է կազմում, պարոն Սուքիասյանը ցավով պատասխանեց, որ շատ երջանիկ կլիներ, եթե դա ճիշտ լիներ, սակայն իրենց բյուջեն կազմում է տարեկան 7մլն. դրամ, որը հիմնականում պահպանման ծախսերի, այսօրինակ այցերի, գրասենյակի պահպանման խնդիրներ է լուծում: «Մեզ մոտ աշխատավարձ են ստանում միայն գլխավոր քարտուղարը և հաշվապահը: Մնացյալ բոլորը կամավորական և հասարակական սկզբունքով են աշխատում: Մեր կառույցը եղել և մնում է անկուսակցական»,-ավելացրեց պարոն Սուքիասյանը: