Ալիշեր Ուսմանովի և Յուրի Միլների DST Global հիմնադրամի ներդրման շնորհիվ (մոտ 800 մլն դոլար) միկրոբլոգների Twitter կայքի կապիտալիզացիան գերազանցել է 8 մլրդ դոլարը և հիմա կազմում է 8.4 մլրդ դոլար: Այս մասին գրում է The Wall Street Journal-ը:
Դեռ հուլիսի սկզբին համաշխարհային լրատվամիջոցները հաղորդել էին, որ DST հիմնադրամը սկսել է ֆինանսավորման նոր փուլ, իսկ ներդրման գումարը կկազմի մոտ 400 մլն դոլար: Այն ժամանակ հայտարարվում էր, որ ներդրման շնորհիվ ընկերության կապիտալիզացիան կհասնի 8 մլրդ դոլարի: Սակայն որոշ մասնագետներ այս աճն աննորմալ են համարում և այն ինտերնետ շուկայի «փուչիկ» են անվանում:
Նախատեսվում է, որ այս տարի միկրոբլոգների Twitter կայքը կստանա 100 մլն դոլար շահույթ, ինչը երկու անգամ ավելի է, քան անցած տարի: Սակայն այլ գնահատականներով՝ Twitter-ը կարող է գերազանցել նաև այս ցուցանիշը՝ հասցնելով այն 200 մլն-ի:
