Մինչև հողերի մասնավորեցումը՝ Հայաստանը ունեցել է մինչև 100 հազար գլխաքանակ ձի: Այնինչ այսօր ձիերի գլխաքանակը հասնում է 10 հազար 777-ի: Հարկ է նկատել, որ Երկրորդ համաշխարհային պատերազմի տարիներին մենք մի քանի տասնյակ հազար ձի ենք ուղարկել բանակ: 40-50թթ. այդ ձիերի գլխաքանակը հասավ 65 հազարի: Այս մասին մեզ հետ զրույցում տեղեկացրեց գյուղնախարարության անասնաբուծության և տոհմային գործերի վարչության պետ Աշոտ Հովհաննիսյանը: Նրա խոսքերով, երբ գյուղատնտեսական աշխատանքներում ներգրավվեց մեխանիզացիան, ձիեր պահելը դարձավ երկրորդական և ձիերի գլխաքանակը աստիճանաբար նվազեց: Սակայն վերջին տարիներին հաջողվում է ձիերի գլխաքանակի նվազումը կանխել զուտ այն պատճառով, որ Հայաստանում հետաքրքրություն է առաջացել ձիասպորտի նկատմամբ: Ձին հետաքրքրություն առաջացրեց սպորտային մարզաձևում, ինչը նաև նպաստեց, որ ձիերի գլխաքանակի նվազման գործընթացը դադարի: «Դա է պատճառը, որ հաջողվում է ձիերի գլխաքանակի նվազումը վերջին տարիներին կանխել, և այն տատանվում է 11 հազարի սահմաններում: Որոշ ընկերություններ փորձում են դրսից ներկրել ձիասպորտի համար պիտանի ձիեր, որ այս ոլորտը զարգացնեն: Մասնավորապես, «Մուլտի ագրո» ընկերությունը և «Արզնի» տոհմային տնտեսությունը ունեն 40-ից ավելի ձի: Այս տարի մոտ 10 գլուխ տոհմային ձիեր են բերվել Ֆրանսիայից և Բելգիայից»,- տեղեկացրեց Աշոտ Հովհաննիսյանը: