Այսօր Երևանում մեկնարկեց «Արմպրոդէքսպո 2010» տասներորդ միջազգային պարենային ցուցահանդեսը, որը տևելու է երեք օր: Ցուցահանդեսի մասնակիցները հիմնականում Հայաստանում պարենային ապրանքներ արտադրողներն էին, ինչպես նաև արտասահմանյան և տեղական առևտրային կազմակերպություններ, գովազդային գործակալություններ: ՀՀ նախագահ Սերժ Սարգսյանն ու Գյուղատնտեսության նախարարը ևս այցելել են ցուցահանդես, շրջել տաղավարներով: Ցուցահանդեսի մասնակից, պահածոների արտադրությամբ զբաղվող «Կոնսեռն» ընկերության փոխտնօրեն Էմիլ Հովհաննիսյանը «Առաջին լրատվականի» հետ զրույցում նշեց, որ ցուցահանդեսին մասնակցելու հիմնական նպատակը նոր կապեր հաստատելն ու իրենց արտադրանքը շահագրգիռ կողմերին ներկայացնելն է:
Եվրազիա ընկերությունը, որը Վրաստանի տուրիզմի դեպարտամենտի պաշտոնական ներկայացուցիչն է Հայաստանում, մասնակցում էր ցուցահանդեսին` որպես սպասարկման ձև ներկայացնելով «ֆուրշետը»: «Փորձում ենք ֆուրշետը` հայկական ավանդույթներին համահունչ, որպես եվրոպական սպասարկման ձև ներկայացնել: Եթե, օրինակ, վիսկի է, այն պետք է ներկայացվի անգլիական ավանդույթին համապատասխան, եթե գինի է` կովկասյան և այլն»,- նշեց ընկերության տնօրեն Գագիկ Մկրտչյանը: