Պետական եկամուտների կոմիտեի օպերատիվ հետախուզության վարչության Սևանի բաժնի և տարածքային հարկային տեսչության աշխատակիցներն օրերս մի շարք խոշոր բացահայտումներ են կատարել: Այս մասին ասվում է ՊԵԿ այսօր տարածած հաղորդագրության մեջ: Արդյունքում, ըստ այս հաղորդագրության, պետությանը հասցվել է շուրջ 1մլրդ 300մլն դրամի վնաս: Անապրանք գործարքներ իրականացրած և հարկեր վճարելուց չարամտորեն խուսափող մի շարք անձանց նկատմամբ հարուցվել են քրեական գործեր: Կան կալանավորվածներ: Նախ քրեական գործ է հարուցվել մայրաքաղաքի բնակիչ Սերգեյ Մուրադյանի նկատմամբ, ում կողմից ղեկավարած տարբեր կազմակերպություններ պետությանն ընդհանուր առմամբ շուրջ մեկ միլիարդ դրամի վնաս են հասցրել: Սերգեյ Մուրադյանը կալանավորված է: Նույն ճակատագրին է արժանացել նաև Ճամբարակի բնակիչ Երիցյանը: Նա գրանցված է եղել մի դեպքում «Վիկտորիա Գևորգյան», «Գոռ և ընկերներ» կազմակերպությունների հաշվապահ, մյուս դեպքում էլ` «Անուշ և Վիկտորիա» ընկերության տնօրեն, այնինչ իրականում հենց ինքն է ղեկավարել այդ կազմակերպությունները, զբաղվել կեղծ հաշիվ-ապրանքագրերի դուրս գրմամբ և անապրանք գործարքներով: Դրանց հետևանքով պետությանը 60մլն դրամից ավելի վնաս է հասցվել: Հարկեր վճարելուց չարամտորեն խուսափելու համար նյութեր են նախապատրաստվել նաև Գեղարքունիքի մարզի Զովաբեր գյուղի բնակիչ «Սարգիս-Վարդան» ընկերության տնօրեն Վարդան Մկրտչյանի վերաբերյալ: Կազմվել է ստուգման ակտ, որի համաձայն ընկերությունը պետբյուջե պետք է լրացուցիչ շուրջ 135մլն դրամ վճարի: Հարուցվել է քրեական գործ: Վարդան Մկրտչյանը ևս կալանավորված է: