Նոյեմբերի 20-ին Լիսաբոնում տեղի ունեցավ Աֆղանստանին նվիրված պետությունների և կառավարությունների ղեկավարների մակարդակով Հյուսիսատլանտյան Դաշինքի Խորհրդի հանդիպումը, որին մասնակցեցին ՀՀ արտաքին գործերի նախարար Էդվարդ Նալբանդյանն ու պաշտպանության նախարար Սեյրան Օհանյանը:
Բարձր մակարդակի հանդիպմանը մասնակցում էին և ելույթ ունեցան ԱՄՆ, Պորտուգալիայի, Աֆղանստանի, Ֆրանսիայի, Գերմանիայի, Միացյալ Թագավորության, Իտալիայի, Աֆղանստանում միջազգային անվտանգության ուժերին մասնակցող այլ պետությունների ղեկավարներ, ՄԱԿ-ի և ՆԱՏՕ-ի գլխավոր քարտուղարները, Եվրոպական հանձնաժողովի նախագահը:
Գագաթնաժողովին ելույթ ունեցավ նաև Հայաստանի արտգործնախարարը, որը նշեց, որ Աֆղանստանի իրավիճակը բազմաթիվ պետությունների մտահոգությունն է հարուցում` անկախ այն հանգամանքից, թե տվյալ երկիրը աշխարհագրորեն որքան մոտ կամ հեռու է Աֆղանստանից, և ընդգծեց, որ հենց դրա ապացույցն է, որ 49 երկրների ներկայացուցիչներ հավաքված են մեկ սեղանի շուրջ` համատեղ քայլեր մշակելու այդ երկրում առկա խնդիրները լուծելու համար: Հենց այս մտայնությամբ է Հայաստանը միացել Աֆղանստանում անվտանգությանը աջակցող միջազգային ուժերին և արտահայտել է իր պատրաստակամությունը ավելացնելու իր մասնակցությունը:
Էդվարդ Նալբանդյանի բնորոշմամբ, ռազմական և ֆինանսական աջակցությունը Աֆղանստանին կարևոր է, սակայն առավել կարևոր է վերականգնել Աֆղանստանի ժողովրդի վստահությունը կայուն, ապահով և բարգավաճ ապագա կառուցելու իր կարողության հանդեպ: Այս առումով նախարար Նալբանդյանը Հայաստանի աջակցությունը հայտնեց միջազգային հանրության կողմից նախատեսվող քայլերին, որոնք թույլ կտան ռազմական չափումից անցում կատարել երկարատև աջակցության ծրագրերին, քաղաքական, տնտեսական և հումանիտար փոխգործակցության ակտիվացմանը:
Լիսաբոնում Հայաստանի արտգործնախարարը հանդիպում ունեցավ նաև Պորտուգալիայի արտգործնախարար Լուիս Ամադոյի հետ:
Ողջունելով Հայաստանի ԱԳ նախարարին` Լուիս Ամադոն ասաց. «Ի դեմս Պորտուգալիայի, Հայաստանը ունի վստահելի բարեկամ, որը պատրաստ է ընդլայնել բոլոր ոլորտներում համագործակցությունը»:
Նախարար Նալբանդյանն իր հերթին ընդգծեց, որ Հայաստանը ցանկանում է գործուն քայլեր ձեռնարկել Պորտուգալիայի հետ հարաբերությունների զարգացումը խթանելու համար, և ստեղծելու այնպիսի փոխգործակցություն, ինչպիսին ունի եվրոպական շատ երկրների հետ:
Զրույցի ընթացքում նախարարները կարևորեցին քաղաքական երկխոսության խթանմանն ուղղված քայլերի ձեռնարկումը, քննարկեցին արտգործնախարարությունների միջև խորհրդատվությունների անցկացմանը, միջազգային կազմակերպություններում փոխգործակցությանը, իրավապայմանագրային դաշտի ձևավորմանը, երկու երկրների միջև մուտքի արտոնագրային ռեժիմի դյուրացմանը, տնտեսական համագործակցությանը վերաբերող հարցեր:
Ընդունելով Էդվարդ Նալբանդյանի՝ Հայաստան այցելելու հրավերը` Պորտուգալիայի արտգործնախարարը տեղեկացրեց, որ Երևան կժամանի 2011 թ. առաջին կեսին:
Գագաթնաժողովի շրջանակներում տեղի ունեցավ հանդիպում Հայաստանի պաշտպանության նախարար Սեյրան Օհանյանի և Պորտուգալիայի պաշտպանության նախարար Օգուստո Սանտոս Սիլվայի միջև:
Երկու երկրների պաշտպանության նախարարները շահագրգիռ քննարկում ունեցան իրենց ղեկավարած գերատեսչությունների համագործակցության ծավալման հնարավորությունների շուրջ:
