2010թ.առաջին 9 ամիսների ընթացքում ԱՄՆ բյուջեի դեֆիցիտը կազմել է $1.3տրլն կամ ՀՆԱ-ի 8.9%-ը: Անցած տարվա տխուր պատկերը չկրկնվեց. 2009թ. նույն ժամանակահատվածում բյուջեի դեֆիցիտը կազմել էր ՀՆԱ-ի 10%-ը: Բացի այդ, մասնագետները հուլիսին անցկացրել էին հետազոտություն, համաձայն որի՝ իրավիճակն առաջին 9 ամիսների ընթացքում էլ ավելի տխուր պետք է լիներ. այն պետք է $177 մլրդ-ով ավել լիներ: Սակայն այդ վատատես կանխատեսումը չիրականացավ, եւ ներդրողներին սա լրացուցիչ հույս է տալիս, որ ԱՄՆ տնտեսությունը դուրս է գալիս ռեցեսիայից: Սակայն տնտեսական աճի համար լուրջ խոչընդոտ է գործազրկության թիվը, որը կայուն մնում է 9.8%: ԱՄՆ-ի ֆինանսների նախարար Թիմաթի Գայտների խոսքերով, «ձեռնարկված միջոցառումները թույլ են տվել խնայել $240 մլրդ, որոնք նախատեսված էին տնտեսության վերականգնման համար»:
Հաջորդ ամիս ԱՄՆ-ում տեղի կունենան խորհրդարանական միջանկյալ ընտրություններ, որտեղ, մասնագետների կարծիքով, կհաղթի Հանրապետական կուսակցությունը: Այս պահին դեմոկրատները մեծամասնություն ունեն Կոնգրեսի երկու պալատներում էլ: Բայց միանշանակ է, որ ով էլ վերահսկի Կոնգրեսը, միեւնույնն է, տնտեսական այս ցուցանիշները խանգարելու են նրանց աշխատելուն:
