Օլիմպիական խաղերի բրոնզե մեդալակիր Արթուր Ալեքսանյանի հայրն ու անձնական մարզիչը՝ Գևորգ Ալեքսանյանը, 1in.am Sport-ի հետ զրույցում ամփոփեց տարին, խոսեց նոր տարուց սպասելիքների մասին, հղեց իր շնորհավորական ուղերձը:
«Ընդհանուր առմամբ կարող եմ ասել, որ 2013 թվականը վատ տարի չէր մարզական հաջողությունների առումով: Տարվա սկզբին գրանցվեց Եվրոպայի առաջնությունում հաղթանակ, Աշխարհի առաջնությունից գոհ եմ, բայց եզրափակիչ գոտեմարտում մրցավարի գործոնն ազդեց: Ընդհանուր առմամբ տարին նորմալ էր:
Կանոնակարգային փոփոխությունները դրական հետևանքներ են ունեցել: Ավելի դիտարժան գոտեմարտեր են լինում: Մարզիկն այս կանոնադրությամբ կարող է իր բոլոր հնարավորությունները ցույց տալ: Չնայած, այստեղ դեռ կա մրցավարական գործոնը: Ես ցանկանում եմ, որ մրցավարական գործոնը մինիմալի հասցվի, և երկու մարզիկները միմյանց պայքարում որոշեն հաղթողին: Կանոնակարգյին փոփոխությունները դրական եմ համարում: Իրոք, ուժեղին ավելի շատ հնարավորություն է տրվում հաղթելու:
Նոր տարին բոլորի համար հաճելի տոն է: Ուրախ ենք դիմավորում, տրամադրվում ենք հաջորդ տարվան: Լավ տրամադրված տեղափոխվում ենք 2014 թվական:
2014 թվականին լինելու է Աշխարհի գավաթի խաղարկություն, Եվրոպայի առաջնություն, Աշխարհի առաջնություն և վերջում Եվրոպայի գավաթի խաղարկություն: Արթուրը 4 առաջնություններից, հավանաբար, կմասնակցի 2-ին՝ Եվրոպայի և Աշխարհի առաջնություններին: Նախապատրաստական փուլը կարելի է ասել սկսվել է Ծաղկաձորի ուսումնամարզական հավաքով: Ինչպես միշտ, գնում ենք դեպի հաղթանակներ:
Շնորհավորում եմ բոլորի Ամանորն ու Սուրբ Ծնունդը, մաղթում նորանոր հաջողությւններ յուրաքանչյուրին իր բնագավառում, իսկ մարզիկներին հաջողություններ և առաջընթաց՝ հաղթանակների, նվաճած մեդալների քանակով: Թող բոլորն առողջ լինեն»: