Նոյեմբերի 18-ին ՀՀ Ազգային ժողովի նախագահ Հովիկ Աբրահամյանը ընդունեց Հայաստանի Հանրապետությունում Ֆրանսիայի արտակարգ և լիազոր դեսպան Անրի Ռենոյին:
ԱԺ նախագահը շնորհավորեց պարոն Ռենոյին Հայաստանում դեսպան նշանակվելու կապակցությամբ և հաջողություններ մաղթեց նրան իր դիվանագիտական առաքելության մեջ: Հովիկ Աբրահամյանը նշեց, որ որպես ավանդույթ Հայաստանում Ֆրանսիայի դեսպաններն իրենց ծանրակշիռ ներդրումն են ունեցել երկու երկրների և ժողովուրդների միջև առկա բարեկամական կապերի ամրապնդման և խորացման գործում` համոզմունք հայտնելով, որ նորանշանակ դեսպանը իր գործունեությամբ նույնպես կնպաստի հայ-ֆրանսիական հարաբերությունների հետագա խորացմանը:
ԱԺ նախագահի խոսքով, հայ-ֆրանսիական հարաբերությունները, որոնք հիմնված են երկու ժողովուրդների դարավոր բարեկամության, փոխադարձ հարգանքի և համակրանքի վրա, վաղուց բնորոշվում են որպես առանձնահատուկ և հաջողությամբ շարունակում են զարգանալ ինչպես երկկողմ, այնպես էլ բազմակողմ ձևաչափով. ձևավորվել է բարձր մակարդակի քաղաքական կանոնավոր երկխոսություն, առկա են սերտ մշակութային կապեր, նկատելի է ֆրանսիական ընկերությունների ակտիվացող ներկայությունը Հայաստանի տնտեսության մեջ:
ԱԺ նախագահի համոզմամբ, հայ-ֆրանսիական հարաբերություններում առանձնահատուկ տեղ ունի միջխորհրդարանական արդյունավետ համագործակցությունը, որին մեծապես նպաստում է պատգամավորական բարեկամության խմբերի գործունեությունը: Պարոն Աբրահամյանը կարևորեց նաև երկու երկրների մարզերի և քաղաքների, ինչպես նաև բազմաթիվ համայնքների ուղղակի և ապակենտրոնացված համագործակցության խորացումը: Հովիկ Աբրահամյանը նշեց, որ Հայաստանը բարձր է գնահատում Ֆրանսիայի` ԵԱՀԿ Մինսկի խմբի համանախագահ երկրի կողմից գործադրվող հետեւողական ջանքերը` ուղղված Լեռնային Ղարաբաղի հիմնախնդրի խաղաղ կարգավորմանը: Հայ-ֆրանսիական հարաբերությունները կարեւորվեցին նաև ԵՄ-Հայաստան համագործակցության տեսանկյունից: Հովիկ Աբրահամյանը անհրաժեշտ համարեց միջազգային կառույցներում առկա արդյունավետ համագործակցության խորացումը:
Շնորհակալություն հայտնելով ընդունելության համար` Ֆրանսիայի նորանշանակ դեսպանը պատրաստակամություն հայտնեց հնարավորինս նպաստելու ֆրանս-հայկական բարձր մակարդակի հարաբերությունների առավել զարգացմանը և խորացմանը: Նա կարևորեց միջխորհրդարանական գործակցությունը և նշեց, որ Հայաստանը այն բացառիկ երկրներից է, որի խորհրդարանի հետ պատգամավորական բարեկամության խմբեր են գործում` և’ Ֆրանսիայի Սենատում, և’ Ազգային ժողովում: Պարոն Ռենոն կարեւորեց նաեւ տնտեսական համագործակցության և միջռեգիոնալ փոխգործակցության խորացումը: Նա բարձր գնահատեց Հայաստանի ջանքերն ուղղված ֆրանկոֆոնիայի զարգացմանը մեր երկրում:
ԱԺ լրատվական ծառայություն