Ռուսաստանցի գործարարներ Ալիշեր Ուսմանովի և Յուրի Միլների DST Global ընկերությունը կարող է գնել Twitter միկրոբլոգների ծառայության բաժնետոմսերի որոշակի մասնաբաժին, հայտնում է gazeta.ru-ն` հղում կատարելով Techcrunch պարբերականին: Ըստ վերջինիս` Twitter-ը ներկայումս ունի ավելի քան 175 մլն. գրանցված օգտատեր, իսկ ընկերության արժեքը փորձագետները գնահատում են $3-5 մլրդ.: DST-ի ներդրումների ծավալը կարող է կազմել $100 մլն.: Ըստ այդ տեղեկության աղբյուրների`Twitter-ի մեկ այլ պոտենցիալ ներդրող է Google կորպորացիան, սակայն վերջինիս հետ գործարքը պակաս հավանական է:
Նոր ակտիվների մեջ ներդրումներ կատարելու ծրագրերի մասին ավելի վաղ հայտարարել էր նաև DST Global-ի գլխավոր տնօրեն Յուրի Միլները: «Դա պետք է լինի ժամանակակից ընկերություն, որի արժեքը գերազանցում է $1 միլիարդը», ասել է նա վերջերս Սան Ֆրանցիսկոյում կայացած Web 2.0 գագաթնաժողովի ժամանակ:
Ըստ Alexa-ի վարկանիշի` Twitter-ն այժմ գտնվում է 10-րդ տեղում աշխարհի բոլոր կայքերի շարքում:
DST Global-ն արդեն մասնաբաժիններ ունի Facebook սոցիալական ցանցում, Groupon զեղչային համակարգում, սոց. ցանցերի համար խաղեր արտադրող Zynga-ում, իսկ ВКонакте սոցիալական ցանցում նրա մասնաբաժինը հասել է 32,5%-ի: Հիշեցնենք, որ DST Global-ի հիմնական ակտիվը Mail.Ru-ն է: