Քաղաքագետ Սերգեյ Մինասյանը, մեկնաբանելով երեկ կայացած Սերժ Սարգսյան-Մեդվեդև և Կասպյան հնգյակի հանդիպումների շարքում Ալիև-Ահմադինեժադ հանդիպումները, նշեց, որ նման հանդիպումները ԼՂ խնդրի կարգավորման համար չեն կարող շրջադարձային լինել. «Այս հանդիպումների նպատակը ժամանակների ճշտումն է, այն հերթական քաղաքական դրվագ է։ Սպասել, որ պետությունների ղեկավարների հանդիպումների ժամանակ կտրուկ փոփոխություն կլինի` ճիշտ չէ»։
Մինասյանի կարծիքով, Աստանայում դեկտեմբերի 1-2-ը կայանալիք ԵԱՀԿ գագաթնաժողովին որևէ որոշիչ փաստաթուղթ չի ստորագրվի. «Եթե ԵԱՀԿ-ում որևէ փաստաթուղթ ստորագրվի, ես կզարմանամ, բայց նույնիսկ եթե ստորագրվի, ապա դա կլինի դեկլարատիվ բնույթ կրող մի փաստաթուղթ, որի հիմնական նպատակը պետք է լինի տարածաշրջանում ստատուս քվոյի վերահաստատումը։ Ռուսաստանը հենց ստատուս քվոյի պահպանման կողմնակիցն է։ ԵՄ-ի, ԱՄՆ-ի և անգամ Թուրքիայի համար Ղարաբաղում պատերազմական գործողությունները ցանկալի չեն, ստատուս քվոյի խախտումը միայն Ադրբեջանին է պետք»։
Սերգեյ Մինասյանը համոզված է, որ գերտերություններն աշխատելու են թույլ չտալ, որպեսզի տարածաշրջանում էսկալացիա լինի, նրանք կողմերին հորդորելու են շարունակել բանակցային գործընթացը։ «Ես չեմ կարծում, որ հայերին կարելի է ինքնասպանության պատրաստ կողմ անվանել, քանի որ տարածքների վերադարձը կնշանակի պատերազմական գործողությունների վերսկսում, ինչը բացի Ադրբեջանից, ոչ մեկին պետք չէ»,- կարծիք հայտնեց քաղաքագետը։
