«Առաջին լրատվական»-ի զրուցակիցն է Գլոբալիզացիայի և տարածաշրջանային համագործակցության վերլուծական կենտրոնի ղեկավար, քաղաքագետ Ստեփան Գրիգորյանը:
-Ռուսաստանի Պետդումայի նախագահ Վյաչեսլավ Վոլոդինը Բաքվում Ադրբեջանի խորհրդարանի նախագահ Օքթայ Ասադովի հետ կայացած հանդիպման ժամանակ հայտարարել է. «Լեռնային Ղարաբաղի հարցերը չեն կարող մեզ չանհանգստացնել: Դուք գիտեք, որ Ռուսաստանը հանդես է գալիս այդ հակամարտության խաղաղ կարգավորման օգտին… Բոլոր նրանք, ովքեր հանդես են գալիս հօգուտ հարաբերությունների սրման, բոլոր նրանք, ովքեր չեն լսում խաղաղ ապրելու ժողովրդի ցանկությունը, իհարկե գնում են լարվածության ճանապարհով: Մենք պետք է ամեն ինչ անենք՝ կանխելու դա»: Նա նաև նշել է, որ Ադրբեջանը մշտապես հանդես է եկել խնդրի կարգավորման կառուցողական դիրքերից, ի՞նչ է սա նշանակում:
-Գաղտնիք չէ, որ Ադրբեջանն ակտիվորեն է աշխատում, և քանի որ Ադրբեջանն իրոք այսօր մտահոգված է այն պրոցեսներով, որոնք ընթանում են Հայաստանում, այդ թվում նաև մտահոգված է նրանով, որ կոռուպցիայի դեմ պայքար է իրականացվում նաև հայոց բանակում, փորձում է այդ պրոցեսը կանխել տարբեր ձևերով: Օրինակ՝ նրանք շատ լավ գիտեն, որ Հայաստանում Ռուսաստանի ցանկացած պաշտոնյայի հայտարարությունը շատ լուրջ է ընկալվում: Հիշո՞ւմ եք, երբ որ ապրիլյան պատերազմից հետո Հայաստանում թափով փոփոխություններ էին իրականացվում, Հայաստան եկան ռուս պատգամավորներ և արեցին ինչ-որ հայտարարություններ, որոնք նյարդայնացնում էին հայ հասարակությանը:
–Նաև չէին կասեցնում, չէին թուլացնում ալիքը:
-Այո՛, ուժեղացնում էին: Բայց ինչո՞ւ օգտագործվեց այդ մեխանիզմը և հիմա էլ նույնատիպ բան է արվում: Դա կապված էր նաև նրա հետ, որ փորձում էին ինչ-որ չափով տորպեդահարել Հայաստանում ընթացող փոփոխությունների պրոցեսները: Ադրբեջանում շատ լավ հասկանում են, որ Հայաստանում լեգիտիմ իշխանություն է, և դա իրենց օգտին չէ, մեր բանակում իրականացվող կոռուպցիայի դեմ պայքարն իրենց օգտին չէ: Բայց մենք պետք է հասկանանք, որ եթե ինչ-որ բան է հայտարարում Պուտինի խոսնակը կամ ԱԳՆ խոսնակ Զախարովան, եթե նրանք մեզ համար վատ բան ասեն, այդ դեպքում համաձայն եմ, կարելի է խուճապի մատնվել և քայլեր ձեռնարկել, հակառակ դեպքում, ինչ որ պատգամավորի կամ խոսնակի կարծիքին չպետք է լուրջ վերաբերվել: Վոլոդինի ասածին չպետք է լուրջ վերաբերվել…
-Կա տեղեկություն, որ սահմանի երկայնքով կա զորքերի կուտակում, և սպառազինություն է տեղափոխվել առաջնագիծ: Գիտենք, որ ակտիվ շարժեր կան Իջևանի, Քելբաջարի ուղղությամբ: Արցախում շատ լուրջ շրջանակներ անհանգստություններ ունեն: Սպառազինության այսպիսի լայնամասշտաբ մոբոլիզացիա երբեք տեղի չի ունեցել: Արդյո՞ք մենք շատ արխային չենք:
-Ո՛չ: Մեր վարչապետը նախօրեին հավաքեց Անվտանգության խորհրդի առաջին նիստը, ես պնդում եմ, որ դա պատահական չէր:
-Դա կապ ունե՞ր այս լարումների հետ:
-Ես ուղղակիորեն կապում եմ դրա հետ և ոչ միայն. վարչապետն ուզում է աշխատեցնել Անվտանգության խորհուրդը:
–Ինչը Ս. Սարգսյանի օրոք ժանգոտված մեքենա էր:
-Այո՛, անհրաժեշտություն է այդ ինստիտուտը աշխատեցնել: Իշխանությունները ադեկվատ արձագանքում են: Ես չեմ կարծում, որ Ադրբեջանը կգնա լայնամասշտաբ պատերազմի: Նրանք այդ լարվածությունը ստեղծելով՝ փորձում են կանխել կուռուպցիայի դեմ վարչապետ Փաշինյանի սկսած պատերազմը, որը սկսեց բանակից: Իսկ բանակում կոռուպցիայի դեմ պայքարը ուժեղացնում է բանակը: Նրանք այդ լարվածությունը ստեղծում են, որ Հայաստանում հայտնվեն մարդիկ, որոնք կասեն՝ սպասե՛ք, ինչ կոռուպցիայի դեմ պայքարի ժամանակ է, քանի որ այնտեղ թշնամին կա: Ինչո՞ւ. որովհետև հերթը գալիս է Սերժ Սարգսյանին. ակնհաայտ է, որ եթե այս նույն թափով պայքարը շարունակվի, ի վերջո Սերժ Սարգսյանին կկանչեն ԱԱԾ, որ ինքը ցուցմունք տա՝ կապված 2016թ. ապրիլյան պատերազմի հետ: Նա կարող է լինել վկայի կարգավիճակով, բայց պետք է ցուցմունք տա, թե ինչպես ստացվեց, որ ասենք փամփուշտ չկար, անհրաժեշտ բաներ չկային և այլն, և ինչպես եղավ, որ դրանից նա նույնիսկ մեկին չձերբակալեց, ոմանք աշխատանքից հեռացվեցին, բայց հետո նրանց պաշտոնը բարձրացվեց… Ես կասկածամիտ չեմ, բայց սա նման էր заговор-ի՝ փոխանակ քննություն անցկացվեր, թե ինչու բանակը պատրաստ չէր, ինչու հրաման չեն տվել պատժիչ գործողություն իրականացնել ադրբեջանցիների դեմ և այլն, ուղղակի ամեն ինչ կոծկեցին, գնաց: Եվ հիմա ժամանակը եկել է, և պետք է Սերժ Սարգսյանին էլ հրավիրել ԱԱԾ, դրա համար ադրբեջանցիներն ուզում են կանխել, քանի որ հասկանում են, որ մեր պաշտպանական համակարգը որքան մաքրվի կոռուպցիոներներից, այնքան բանակը ավելի ուժեղ կդառնա: Ես չեմ բացառում, որ նախկին իշխանությունների մեջ կային մարդիկ, ովքեր դավաճանեցին հայ ժողովրդի շահերը՝ Ռուսաստանի միջոցով, և հակահարված տալու հրաման չտրվեց ապրիլյանի ժամանակ: Բայց մեր բանակը հակահարված տվեց, մեր երիտասարդները ազգին թիկունք կանգնեցին, լուրջ զոհեր ունեցանք, բայց հրամանատարները առաջ գնալու հրաման չտվեցին: Ոչ ոք միամիտ չէ և հասկանում է, որ այստեղ ինչ-որ լուրջ բաներ կան: Սերժ Սարգսյանին պետք է հրավիրել ԱԱԾ, և շատ բաներ կարող են բացահայտվել: Ես ուզում եմ ողջունել Նիկոլ Փաշինյանի այս քայլերը և ասել՝ շարունակեք: Հենց կոռուպցիայի դեմ պայքարը կկանգնեցի թշնամուն, նա չի համարձակվի հարձակվել մարտունակ բանակի վրա: Այո՛, միշտ պետք է պատրաստ լինենք, գիտենք, որ Ադրբեջանն անկանխատեսելի է, կարող է սադրանքի գնալ, բայց Ադրբեջանում այդքան խելք ունեն և հասկանում են, որ Հայաստանում լեգիտիմ իշխանություն է, և եթե իրենք հարձակվեն, Նիկոլ Փաշինյանին ոչ ոք չի համարձակվի ասել՝ պատժիչ գործողություններ չզարգացնեք, նա կզարգացնի պատժիչ գործողություններ, և Ադրբեջանը ծանր վիճակում կհայտնվի: Մինչդեռ Ս. Սարգսյանի դեպքում նույնիսկ ոչ թե Պուտինի այլ ավելի ցածր մակարդակով զանգում և ասում էին՝ նստի՛ր տեղդ, թե չէ քո մասին ինչ կա-չկա կհրապարակենք: Բացի դրանից՝ ամբողջ աշխարհը նայում է, թե Հայաստանում ինչ է կատարվում՝ հեղափոխություն, կոռուպցիայի դեմ պայքար, սկսվում են սպասված ռեֆորմներ, և այս ֆոնի վրա Հայաստանի վրա հարձակվելը շատ թանկ կնստի Ադրբեջանի վրա, Ադրբեջանը պետք է շատ լավ հաշվարկ անի:
Հարցազրույցն ամբողջությամբ՝ տեսանյութում: