Դեռ 2015 թվականի դեկտեմբերի 28-ից Բաղրամյանի թռչնաբուծական ֆաբրիկայի արտադրությունը կասեցվեց։ 56 թռչնանոցի դռները կողպվեցին։
Թռչնաբուծարանն առաջին հուժկու հարվածը ստացավ «Գազպրոմ Արմենիա» ընկերությունից, որը մեկ գիշերում անջատեց գազամատակարարումը՝ ընկերությանը հասցնելով ավելի քան 600.000 դոլարի վնաս։
«Առաջին լրատվական»-ը բազմիցս անդրադարձել է Բաղրամյանի թռչնաբուծական ֆաբրիկայի սեփականատեր Արմենակ Խաչատրյանի ահազանգին։ Դեռ 2016-ի փետրվարին գործարարը պետությունից աջակցություն խնդրեց՝ պայմանով, որ պետությունը սուբսիդավորում է գործարանը վերագործարկելու համար, գործարարն ապահովում է 650 աշխատատեղ՝ նվազագույնը 200 դոլար աշխատավարձով։ Ավելի ուշ խնդրի հանրային հնչեղության շնորհիվ թռչնանոցներից մեկը սկսեց գործել, որը, սակայն, երկար կյանք չունեցավ։ Հարկային և վարկային տեռորը ֆաբրիկայի սեփականատիրոջը ստիպեց լքել Հայաստանը։
Խնդրից երկու տարի անց Բաղրամյանի թռչնաբուծական ֆաբրիկայի սեփականատերը դեռ չի կորցրել հույսը։ Նա կառավարությունից և գործող իշխանությունից պահանջում է արդարություն։
