Ընդունված է ասել, որ ապրիլ-մայիս ամիսներին Հայաստանում տեղի ունեցավ թավշյա հեղափոխություն, որի արդյունքում կոռումպացված և հակաժողովրդավարական իշխանությունը ժողովրդական շարժման ճնշման տակ հեռացավ, և նրան փոխարինելու եկավ արդարադատ, չկոռումպացված և կոռուպցիայի դեմ պայքարող, աշխարհի ամենաժողովրդավարական իշխանությունը: Հանրության մոտ մի պահ իսկապես արդար երկրում ապրելու հույս առաջացավ, որովհետև նոր իշխանությունը խոստացավ վերջ դնել մենաշնորհներին և կոռուպցիային: Իսկ որտեղ է ամենամեծ կոռուպցիան, իհարկե այնտեղ որտեղ ամենաշատ փողը կա, հարկահավաքման համակարգում, պետական եկամուտների կոմիտեում: Իսկ ՊԵԿ-ից ստացվող տեղեկությունները մեզ հանգեցնում են այն եզրահանգմանը, որ այնտեղ ոչ թե հեղափոխություն, այլ հակահեղափոխություն է եղել, համակարգ են վերադառնում նախկինում ռիսկային և կոռումպացվածի համբավ ունեցող աշխատակիցները:
2017թ. հունիսին ՊԵԿ կառուցվածքային փոփոխությունների արդյունքում տեղի ունեցավ աշխատակիցների մոտ 40 տոկոսի կրճատում: Հիմք ընդունելով ՊԵԿ-ի ներքին անվտանգության վարչությունում առկա ինֆորմացիան՝ աշխատանքից ազատվեցին վարչությունների և բաժնի պետեր, ինչպես նաև շարքային աշխատակիցներ: Հիմա նրանք հերթով վերականգնվում են ՊԵԿ-ում, որովհետև երկրում տեղի է ունեցել թավշյա հեղափոխություն:
Արթուր Հարությունյանը մինչև հեղափոխությունը աշխատել է հարկային մարմիններում՝ զբաղեցնելով բավական բարձր պաշտոններ, բայց 2016թ. հեռացվել է Կենտրոնի հարկային տեսչության պետի պաշտոնից ու համակարգից և տեղավորվել «Մետրոշինվերանորոգում» ՓԲԸ-ում որպես ֆինանսական խորհրդատու: Սա ծանր հարված էր Հարությունյանի համար, բայց ահա տեղի ունեցավ բաղձալի հեղափոխությունը և նա մայիսի 21-ին նախ նշանակվեց ՊԵԿ օպերատիվ վարչության պետ, իսկ դրանից էլ 10 օր հետո ՊԵԿ միջին և խոշոր հարկ վճարողների հարկային տեսչության-վարչության պետ: Իսկապես հեղափոխական առաջխաղացում:
Լաուրա Եղիազարյանը, որը Կենտրոնի հարկային ծառայությունում աշխատել է 40 տարի, հարկային մարմիններում հայտնի է հարկայինի Բրեժնև անունով: Տիկին Եղիազարյանը կենսաթոշակային տարիքի կին է և նրան ուղարկել էին վաստակած հանգստի, բառի բուն իմաստով, որովհետև նա իր աշխատանքային գործունեության ընթացքում իսկապես հսկայական ունեցվածք է վաստակել: Բայց հատուկ նրա համար ստեղծել են վարչության պետի խորհրդականի հաստիք, և նա ևս կարող է բավարարված լինել հեղափոխության հաղթանակով: Հիմա նա ոչ միայն ստանում է պետական աշխատավարձ, այլ նաև կարող է տանիք լինել իր բազմաթիվ բիզնեսներին:
Նաիրա Փամբուկյանը Էրեբունու հարկային տեսչության սպասարկման բաժնի պետն էր և որի անվան հետ էր կապված բազմաթիվ հարկատուների հաշվապահությունը վարելու փաստերը, ինչը արգելված գործառույթ է հարկային ծառայողի համար: Փամբուկյանին հեռացրել էին աշխատանքից, բայց նա հեղափոխական ալիքի վրա նորից վերականգնվել է իր նախկին աշխատավայրում:
Գոհար Զաքարյանը երկար տարիներ աշխատել է Կենտրոնի տեսչության պետի տեղակալ, հետո այլ պաշտոններ է զբաղեցրել համակարգում: Նրան ևս որպես ռիսկային աշխատակից հեռացրել էին աշխատանքից և համակարգից: Ռիսկային բնորոշումը նշանակում է մի բան. մարդուն բռնացրել են ինչ-որ մութ գործարքի կամ անօրինական գործունեության մեջ, բայց չեն ուզում դրան հրապարակային բնույթ տալ, քրեական գործ հարուցել, վատություն անել, ազատում են աշխատանքից և դրանով համարում նրան պատժված: Որովհետև հարկայինից ազատվելուց ավելի ծանր և հակամարդկային պատիժ դժվար է անգամ հորինել: Բարեբախտաբար տեղի ունեցավ թավշյա հեղափոխությունը և տիկին Զաքարյանը հիմա օպերատիվ հետախուզության վարչությունում բաժնի պետ է:
Խաչատուր Բադալյանը, որը մինչև անցյալ տարի ՊԵԿ ակցիզային բաժնի պետն էր և ազատել էին աշխատանքից, դժբախտաբար, դեռ չի վերականգնվել իր նախկին աշխատանքում, բայց արդեն համակարգում է խորհրդականի հաստիքով, և դա արդեն վատ չի, որովհետև հեղափոխությունը չի ավարտվել, և արդարությունը ամեն տեղ չի, որ վերականգնվել է մինչև վերջ:
Գերասիմ Մկրտչյանը, Արմեն Օհանյանը անցած տարի համակարգից հեռացված օպեր բաժնի պետեր են և նրանց մի քանի օր առաջ կրկին հետ են ընդունել համակարգ:
Բնականաբար սա ամբողջ ցանկը չէ, և վերականգնումները շարունակվում են: Այս մարդիկ պայքարել են նախորդ հանցագործ ռեժիմի դեմ: Նրանք ինչ-որ իմաստով հանցագործ ռեժիմի զոհերն են, որովհետև հեռացվել են աշխատանքից և հեղափոխության հաղթանակի շնորհիվ վերականգնվել են իրենց աշխատավայրում: Հարկատուները իհարկե սարսափած են հարկայինում տեղի ունեցած փոփոխություններից և պատկերացնում են, թե ինչ փորձություններ են իրենց սպասվում առաջիկայում: Բայց ինչ էլ լինի, ինչ զոհողություններ էլ պահանջվեն, պետք է անտրտունջ տանել դրանք, դրանք հանուն հեղափոխության են, թավշյա հեղափոխության: