«Ընդհանրապես ֆինանսական և բանկային համակարգը տնտեսության զարգացման կարևորագույն գործոններից է և այո, նոր կառավարությունից այս առումով ևս ակնկալիքներ կան․ թեև տոկոսադրույքները ձևավորվում են շուկայական իրավիճակում և կառավարությունն որևէ ձևով ուղղակիորեն չի կարող ազդել բանկային համակարգի տոկոսադրույքների վրա, սակայն միջնաժամկետ և երկարաժամկետ հատվածում հնարավոր են դրական փոփոխություններ՝ հաշվի առնելով այն սպասումները, որոնք կան տնտեսությունում և դա կարող է բերել նաև տոկոսադրույքների որոշ չափով նվազման»,- «Առաջին լրատվական»-ի հետ զրույցում նշեց տնտեսագետ Մեսրոպ Առաքելյանը՝ անդրադառնալով նոր կառավարության գործունեության արդյունքում ֆինանսական և բանկային համակարգում հնարավոր փոփոխություններին ու կառավարությունից ակնկալվող քայլերին։
Տնտեսագետի խոսքերով՝ օտարերկրյա ներդրողների համար որևէ երկրի բանկի գործունեության վարկանիշը չի կարող լինել ավելի դրական, քան տվյալ երկրինը, նրանք առաջնորդվում են պետության ընդհանուր վարկանիշով, սակայն Առաքելյանի գնահատմամբ՝ Հայաստանի նոր կառավարության գործունեության արդյունքում առաջիկայում կունենանք միջազգային ֆինանսական կազմակերպությունների ավելի դրական և վստահելի վերաբերմունք, ինչը հնարավորություն կտա բանկերին ավելի ցածր տոկոսադրույքներով ֆինանսական միջոցներ ներգրավել միջազգային ֆինանսական կառույցներից և սա էլ իր հերթին կազդի արդեն վարկավորման տոկոսադրույքների վրա։ Տնտեսագետը Հայաստանի վարկանիշի բարձրացման նախադրյալներ արդեն տեսնում է և ընդգծում դրական ֆոն ապահովելու գործոնները։
«Կարծում եմ, որ արդեն իսկ Հայաստանի նկատմամբ վստահության որոշակի միջավայր է ձևավորվել և առաջիկայում էլ սպասվող արտահերթ ընտրությունների անցկացմամբ պայմանավորված սպասումներ կան և այս ընթացքում էլ նոր կառավարության գործունեության շնորհիվ այդ վստահության մթնոլորտն ավելի կամրապնդվի և մեկ տարի հետո արդեն դրական արդյունքներ կարող ենք ակնկալել»,-հավելեց Մեսրոպ Առաքելյանը։
Մանրամասները՝ տեսանյութում։