Թբիլիսիում տեղի ունեցող բազմահազարանոց հավաքի մասնակիցները Ռուսթավելիի պողոտայի վրա՝ Վրաստանի խորհրդարանի շենքի առջև, պահանջել են կառավարության հրաժարականը։ Ակցիայի կազմակերպիչները նաև կոչ են արել Վրաստանի նախագահ Գեորգի Մարգվելաշվիլիին գալ Ռուսթավելիի պողոտա և միանալ ցույցին։ Գլխավոր դատախազ Իրակլի Շոթաձեի հրաժարականից հետո պահանջել են նրան պատասխանատվության ենթարկել և վերակազմավորել իրավապահ և դատական համակարգերը։
Ավելի վաղ, այսօր, բազմահազարանոց բողոքի ակցիա էր տեղի ունեցել Վրաստանի Գլխավոր դատախազության շենքի մոտ։ Այստեղ բողոքում էին բարձր դասարանցիներ Դավիդ Սարալիձեի և Լևան Դադունաշվիլիի սպանության գործով դատարանի վճռից։ Սպանվածներից մեկի հայրը պնդում է, որ ողբերգության իրական մեղավորներին թաքցնում դատախազության նախկին բարձրաստիճան պաշտոնյաներից մեկը, որի որդին նույնպես մասնակցել է զանգվածային ծեծկռտուքին, որի ընթացքում էլ զոհվել են դեռահասները։ Ընդդիմությունը պահանջել և հասել է գլխավոր դատախազի հրաժարականին, ինչպես նաև սպառնացել է «մկրատների հեղափոխությամբ»։