Երևանի ընդհանուր իրավաության դատարանի՝ Նոր Նորքի տարածքում գտնվող նստավայրում նորանշանակ դատավոր Արման Հովհաննիսյանի նախագահությամբ սկսվեց Օնիկ Մկրտչյանի գործով դատական քննությունը:
27-ամյա Օնիկ Մկրտչյանին մեղադրանք է առաջադրվել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:
Ըստ մեղադրանքի՝ 2017 թվականի նոյեմբերի 30-ին Երևանում՝ Սարի Թաղի 18-րդ փողոցի տներից մեկի դիմաց, Օնիկ Մկրտչյանը վիճաբանել է 1953 թվականին ծնված Գագիկ Հովհաննիսյանի հետ:
Վերջինս հայտնի էր «Կուճի» մականունով: Ըստ տեղեկությունների՝ տուժողը նախկինում 6 անգամ դատապարտված է եղել, այդ թվում նաև՝ իր եղբոր սպանության համար…
Ըստ այս գործով առաջադրված մեղադրանքի՝ դեպքի օրը, ժամը 12-ի սահմաններում իր տան առաջ գտնվող 64-ամյա Գագիկ Հովհաննիսյանը անհասցե հայհոյանքներ է տվել: Օնիկ Մկրտչյանը նրան դիտողություն է արել, ինչի արդյուքում վիճաբանություն է առաջացել:
Վիճաբանության ժամանակ Օնիկ Մկրտչյանը, ըստ մեղադրանքի, սևեռվող շեղբ ունեցող զսպանակային ծալովի դանակով հարվածներ է հասցրել Գագիկ Հովհաննիսյանին, պատճառել է ծանր վնասվածքներ ձախ քունքային շրջանում, կրծքավանդակի ձախ կեսի շրջանում, վնասել է տուժողի սրտապարկը, սիրտը:
Տուժողի դիակը հայտնաբերվել է իր տանը՝ խոհանոցի հատակին:
Ստացած վնասվածքներից Գագիկ Հովհաննիսյանը մահացել է:
Օնիկ Մկրտչյանը դատարանում հայտարարեց, որ առաջադրված մեղադրանքը չի ընդունում, իրեն մեղավոր չի ճանաչում: Ավելի մանրամասն ամբաստանյալն իր դիրքորոշումը կհայտնի գործի քննության ընթացքում:
Դատական այս նիստին ներկա չէր տուժողի իրավահաջորդը: Չէին ներկայացել նաև վկաները:
Նիստի սկզբում մեղադրող դատախազ Է. Հարությունյանը միջնորդեց քրեական գործին կցել իրեղեն ապացույց հանդիսացող սևեռվող շեղբով դանակն ու դատահետքաբանական փորձաքննության եզրակացությունը, որը նախաքննության ավարտին դեռ նախաքննական մարմինը չէր ստացել:
Դատարանը սահմանեց ապացույցների հետազոտման կարգը՝ կհարցաքննվեն վկաներն ու տուժողի իրավահաջորդը, կհետազոտվեն գործում առկա ապացույցները, կհարցաքննվի ամբաստանյալը:
Վկաների հարցաքննությունը կսկսվի հաջորդ նիստում: