«Առաջին լրատվական»-ի զրուցակիցն է ԱԺ նախկին պատգամավոր Գուրգեն Արսենյանը:
– Հարգելի Արսենյան, քաղաքական որևէ ուժի հետ կապեր պահպանվո՞ւմ են Ձեր կողմից:
– Բնականաբար քաղաքական բոլոր միավորների հետ ունենք կապեր, քննարկումներ ենք իրականացնում քաղաքական ուժերի և քաղաքացիական հասարակության, ՀԿ-ների ներկայացուցիչների հետ: Քաղաքականության մասով զենքերը վայր դնելու անհրաժեշտություն չկա. թայմ աութ ենք վերցրել:
– Դա նեղացածությա՞ն հետևանք է եղել:
– Դա քաղաքական գործունեության որոշակի հատվածի ամփոփում էր:
– ԱԱԾ հայտարարությունը շատերին է զարմացրել, որ այսպիսի բաց քայլի է գնում. խոսքը վերաբերում է ապօրինի հարստացածների նկատմամբ պատասխանատվության որոշակի չափանիշներ կիրառելուն:
– Այդ տեղեկատվությունը շատ հակիրճ էր և խորհրդապահական բնույթ ուներ: Հասարակությունը տեղեկացված է միայն մտադրությունների մասին: Մարդիկ փորձ են անում փոխել գործունեության շրջանակը, լինել ավելի բաց, հասուն… Եթե խոսքն այն մասին է, որ եղել է գործարարություն և չեն վճարվել հարկեր, դա եղել է հետևանք: Պետք է հասկանանք՝ որն է եղել պատճառը, ինչպես է եղել, որ ՀՀ տնտեսական համակարգում, որը տոտալ վերահսկողության տակ է եղել պատկան մարմինների կողմից, հայտնվել են մարդիկ, որոնք կարողացել են այլ անձանց անձնագրերով հիմնադրել բիզնեսներ, ստանալ եկամուտներ և չմուծել համապատասխան հարկեր: ԱԱԾ-ն էլ է այդ պատկան մարմիններից: Եթե ԱԱԾ-ն իր մեջ քաջություն է գտել ինքնամաքրման պրոցես սկսելու, միայն կարելի է ողջունել: Ես կցանկանայի, որ ԱԱԾ-ն խոսեր ոչ միայն տնտեսական գործունեություն ծավալած և հարկեր չմուծած անձանց, այլ նաև այն անձանց մասին, որոնց տարբեր քաղաքական կառույցներ ներդրել են որպես գաղտնի գործակալ, որոնք զբաղվում էին քաղաքական գործունեությամբ, սակայն իրականացնում էին ԱԱԾ հանձնարարությունը:
– Դա ԱԱԾ իրավունքների մեջ մտնում է՝ ունենալ ականջներ այնտեղ, որտեղ պետք է:
– Ես խոսում եմ մարդկանց մասին, ովքեր ներդրված իրականացնում էին քաղաքական գործունեություն, ականջները տարբեր բաներ են: Ես, որպես ՀՀ քաղաքացի և քաղաքական կուսակցության ղեկավար, ունե՞մ իրավունք իմանալ, թե ով էր գալիս ինձ մոտ պրովոկացիա անում, փորձում ուղղորդել ոչ օրինական գործողությունների, հետո գնում զեկուցագիր էր դնում սեղանին:
– Հիմա հետահայաց ի՞նչ եք կարծում, ինչի՞ համար էր արվում:
– Որպեսզի վերահսկելի լինեին համակարգերը, որպեսզի վերահսկելի լիներ այն շարժումը, որը կոչվում է ժողովրդավարության համար հասարակության պայքար, որպեսզի խեղդեին հենց բնում, որպեսզի իշխանությանը հանկարծ վնաս չսպառնար: Հասարակական հարթություններում տարածվում է մի կեղծ պատկերացում, որ ախըր կարող է պետությանը վնասեն, որ հիմա ջահելներ են նշանակել, այս շարժումը կարող է պետությանը վնասել: Կեղծությունը կայանում է նրանում, որ պետությանը ոչ մի վնաս չկա, դա իշխանությանը կարող է վնասել: Նույնականացրել էին իշխանությունը, պետությունն ու պետականությունը, իրենք իրենց համարում էին պետություն, բայց իրենք ընդամենը իշխանություն էին:
– Արդեն ենթադրում եմ, թե ինչու է Արսենյանը թողել գործարարությունը:
– Արսենյանը գործարարությունը ընդհանրապես դադարեցրեց մոտավորապես 2 տարի առաջ: Ճնշումներ չկային, կային պատկերացումներ, որ մարդիկ հնարավոր է՝ անցնեին թույլատրելի սահմանները: Չեմ ուզում մանրամասնել: Իմ տնտեսական միավորները գործունեության ընթացքում մոտ 200 մլն դոլար հարկ են վճարել պետբյուջե, և բացառիկ տնտեսական գործունեության ոլորտներից մեկն էր, որտեղ վճարվում էր հարկերը լրիվ ծավալով:
– Իշխանությանը ձեռք չէր տալիս Արսենյանի քաղաքակա՞ն գործունեությունը, թե՞ տնտեսական:
-Քաղաքական. շատ կոշտ քննադատության էի արժանացնում օրենսդրական նախաձեռնությունները, Հարկային օրենսգրքի քննադատությունը:
– Որը նախկինում չէիք անում:
– Նախկինում մի քիչ ավելի մեղմ էի քննադատում: Բայց երբ Հարկային օրենսգիրքը պետք է հաստատեին և դրա հետևում էլ հիմնական ջատագովները համաշխարհային ֆինանսական կառույցներն էին, որը ես դիտարկում եմ որպես միջամտություն Հայաստանի ներքին գործերին, արդեն ես չէի կարող ինձ զսպել ու դաժան քննադատության ենթարկեցի:
– Նախկինում Դուք օգտվո՞ւմ էիք իշխանության տանիքից:
– Ես բացարձակապես չեմ օգտվել իշխանության տանիքից, չեմ էլ ունեցել դրա անհրաժեշտությունը, ես ինքնաբավ մարդ եմ, չունեմ որևէ տանիքի կարիք:
– Ինչպե՞ս կարող էիք հայտնվել ԱԺ-ում առանց տանիքի:
– ԱԺ-ում ես հայտնվել եմ դաժան պայքարի արդյունքում, այդ թվում նաև մեծամասնական ընտրակարգով՝ 2000-ին:
– Վերադառնանք ԱԱԾ հայտարարությանը, որտեղ բավականին նուրբ շերտեր կան: Դուք օլիգա՞րխ եք, թե՞ հարուստ՝ Հայաստանի չափանիշներով:
– Հայաստանի չափանիշներով ես հարուստ մարդ եմ:
– Իսկ ո՞րն է տարբերությունը օլիգարխի և հարուստ մարդու. հիմա այդպիսի սահման է փորձվում գծել:
– Իշխանության, տնտեսության, հասարակության վրա ազդեցության կոմպլեքս է, բայց իշխանությունը պարտադիր է:
– Արտասահմանում հարուստը միշտ հպարտանում է իր գրաված դիրքով:
-Ես էլ եմ հպարտանում: Ես չեմ թաքցրել: Եվ երբ բերել էին մի շատ պոպուլիստական սոցիալական ծրագիր, ես ամբիոնին մոտեցա, ասացի՝ ելույթ եմ ունենում որպես Հայաստանի հարուստ մարդկանց ներկայացուցիչ:
– Ինչքա՞ն է Ձեր կարողությունը:
– Եթե այս պահին հայտարարագրենք՝ 15 մլն դոլար:
– ԱԱԾ-ի հայտարարությունը, ըստ Ձեզ, օլիգարխի՞ն է ուղղված, թե՞ հարուստին:
– ԱԱԾ հայտարարությունը ո՛չ հարուստին է ուղղված, ո՛չ օլիգարխին, այլ իրավախախտում իրականացնողին: Ցանկացած նման գործողության հետևում կանգնած են եղել պետության կողմից լիազորություններ ունեցող մարդիկ, այն մարդիկ, ովքեր պետք է վերահսկողություն իրականացնեին: Եթե երկրում կա լայն ծավալի մաքսանենգություն, ուրեմն այնտեղ անպայման մասնակցում են մաքսանենգության դեմ պայքարի վարչության ներկայացուցիչներ: Եթե երկրում կայացել է այդ պրոցեսը, ուրեմն պաշտոնյաները եղել են մասնակից:
– Հիմա եկել են մարդիկ, որ ուզում են մաքրել այդ ամենը:
– Ես միայն ողջունում եմ: