Երեկ Նիկոլ Փաշինյանը ֆեյսբուքյան տեսաուղերձով ցույց էր տալիս կառավարական այն առանձնատունը, որտեղ հիմա ապրում է նրա ընտանիքը: Ավելի վաղ Փաշինյանը հանրության սեփականությունն էր դարձրել Բաղրամյան 26-ի և Հանրապետության հրապարակի իր շքեղ աշխատասենյակները:
https://www.youtube.com/watch?v=UYmr0WctbdE
Իշխանության պալատների, դղյակների` տասնամյակներով գոցված դռները բացվում են հասարակության առջև: Սա արդեն դրական է, որովհետև բացահայտում է համակարգը բացելու Փաշինյանի պատրաստակամությունը:
Մյուս կողմից` այս տեսարանները հետաքրքիր կարող են լինել հասարակության համար, որի հետհեղափոխական վակուումը դեռ լրացված չէ բովանդակությամբ, նոր Հայաստանի հագեցած օրակարգով:
Տպավորություն ունենք, որ մի փոքր աղճատված են պատկերացումները հեղափոխության մասին:
Բաղրամյան 26-ն, օրինակ, դարձել էր անձնակենտրոն, ավտորիտսր իշխանության սիմվոլ: Նույնիսկ հեղափոխական գետը չի կարող մաքրել այդ պայմանական ճահիճը` հատկապես էյֆորիայի անխուսափելի ավարտից հետո: Բաղրամյան 26-ը «ժողովրդականցնելու » փորձերը, մեղմ ասած, ձախողված են: Հեղափոխությունը պետք է ձևավորեր նոր պատկերացում իշխանության բովանդակային, ինստիտուցիոնալ առաքելության մասին, որը հաստատ չի կարող խորհրդանշվել Բաղրամյան 26-ով:
Կառավարական դաչա կոչվածն իշխանության վերնախավի և հասարակության անջրպետի խորհրդանիշն է, եթե նույնիսկ հասարակությունը մանրամասն տեղեկանա, թե քանի շակալ է թափառում կառավարական առանձնատան բացատում: Միևնույն է` կառավարական ամառանոցն` իր պարիսպներով, խորհրդանշում է իշխանության հզորությունն ու հասարակության խեղճությունը: Վաղ թե ուշ պարիսպների հակառակ կողմը հասարակության համար դառնալու է անտեսանելի, որովհետև հենց դա է պարսպի խորհուրդը:
Մեծ Բրիտանիայում առկա է ընդամենը 50 ծառայողական ավտոմեքենա, Դանիայում՝ 23: Եվրոպական երկու երկիր` արդյունավետ կառավարմամբ: Եթե Հայաստանում շարունակելու է 1000-ից ավելի «պադավատ» մնալ, վաղ թե ուշ, դրանց պատուհաններից աշխարհը երևալու է ծուռ հայելու էֆեկտով:
Հայաստանում տեղի ունեցածն ոչ թե իշխանափոխություն էր, այլ` հեղափոխություն, որն ուղղված էր, առաջին հերթին` այսպես կոչված, էլիտայի արտոնությունների համակարգի դեմ: Եթե այդ արտոնությունները պահպանվեն, շուտով դրանից օգտվող մարդիկ կփոխվեն` իշխանական դղյակներից դուրս ծնելով նոր հեղափոխության պահանջ: