Հայաստանում տեղի ունեցած իշխանափոխությունից հետո, երբ այլևս իշխանության են ժողովրդի կողմից վստահություն վայելող մարդիկ, քաղաքական թիմ, կարծիքներ են հնչում, թե որքանով է նպատակահարմար Հանրային խորհրդի հետագա գործունեությունը։
Հիշեցնենք, որ Հանրային խորհուրդը ստեղծվեց 2008-ից հետո և պետք է կատարեր կամուրջի դեր իշխանության և հասարակության տարբեր շերտերի միջև։ Ծառայեր ի նպաստ երկրի ներքաղաքական համերաշխության և քաղաքացիական հասարակության ձևավորմանը` հաշվի առնելով ժողովրդի տարբեր շերտերի ցանկությունները: Կարևորելով Հանրային խորհրդի դերը երկրի հանրային կյանքում` կատարվեցին անգամ փոփոխություններ ՀՀ Ազգային ժողովի և կառավարության կանոնակարգերում` հնարավորություն տալով Հանրային խորհրդին մասնակցել այդ մարմինների աշխատանքներին և ներկայացնել իր դիրքորոշումը: Սկզբում աշխատավարձ ստանում էր միայն Հանրային խորհրդի նախագահ Վազգեն Մանուկյանը, իսկ մյուս անդամները հասարակական հիմունքներով էին, սակայն անցած տարի Հանրային խորհրդի գոյությունը ամրագրվեց արդեն սահմանադրորեն։ «Հանրային խորհրդի մասին» օրենքով սահմանվեց, որ ՀԽ-ն ունենալու է ոչ թե 36, այլ 45 անդամ և ֆինանսավորվելու է բյուջեից՝ առանձին տողով: Ըստ Սահմանադրության՝ Հանրային խորհուրդը կառավարության խորհրդակցական մարմին է, որի գործունեությունը սահմանվում է օրենքով:
Նոր օրենքով Հանրային խորհրդում 12 ոլորտային հանձնաժողովների փոխարեն լինելու են 15-ը:
«Հանրային խորհրդի մասին» օրենքի քննարկումների ժամանակ Ազգային ժողովում բավական խիստ գնահատականներ հնչեցրած ԱԺ «Ծառուկյան» խմբակցության պատգամավոր Նաիրա Զոհրաբյանը այսօր էլ «Առաջին լրատվական»-ի հետ զրույցում ասաց, որ չի տեսնում Հանրային խորհրդի անհրաժեշտությունը։ «Որքան էլ մեծ լինի իշխանության հանրային վստահության ռեսուրսը, միշտ իշխանությունը իր թիկունքում պետք է զգա հանրության ձայնը։ Այլ բան է, որ Հանրային խորհուրդը, որը գործում է Հայաստանում, ես դա համարել և շարունակում եմ համարել ընդամենը մի քանի թեկուզ հարգարժան մարդկանց պարապ ժամանակը լրացնելու համար ստեղծված կառույց։ Որևէ լուրջ խնդիր Հանրային խորհուրդը մեծ առումով չի լուծել։ Կամ էլ նրա բարձրացրած խնդիրները նախորդ իշխանության համար եղել են ձայն բարբառո անապատի։ Մենք ունեցել ենք այնպիսի տոտալիտար իշխանություն, որը թքած է ունեցել ոչ միայն ժողովրդի վրա, այլև իր իսկ կողմից ստեղծված Հանրային խորհրդի վրա։ Հանրային խորհրդի այս ձևով, այս բովանդակությամբ, այս մտածելակերպով, կարծրացած ստերիոտիպներով ու փոխվելու ոչ ընդունակ մարդկանցով, հետագա գոյությունը աննպատակահարմար է։ Նման Հանրային խորհուրդ մեզ ոչ երեկ է պետք եղել, ոչ այսօր է պետք լինելու, ոչ էլ, վստահաբար, վաղը»,- նկատեց Նաիրա Զոհրաբյանը։ Նրա խոսքերով՝ կապ չունի, որ Հանրային խորհրդի գոյությունը օրենսդրորեն է կարգավորվում։ Միշտ էլ հնարավոր է օրենքը փոփոխել։ «Կարծում եմ՝ առաջիկայում մեր խորհրդարանում բազմաթիվ օրենքներ, որոնք մեր իշխանությունը ձևել էր իր վրայով, այս կամ այն անձի քիմքին հաճո, կոնկրետ անձանց համար, այդպիսի օրենքները լրջագույնս պետք է վերանայվեն»,- ասաց տիկին Զոհրաբյանը։
Հանրային խորհրդի ֆինանսա-տնտեսական և բյուջետային հարցերի հանձնաժողովի անդամ Վազգեն Սաֆարյանը, մինչդեռ, համարում է, որ, անկախ իշխանության փոփոխությունից, Հանրային խորհրդի գործունեության անհրաժեշտությունը միշտ կա։ «Հանրային խորհրդի անհրաժեշտությունը Սահմանադրությամբ ամրագրված է։ Կարծում եմ, շատ-շատ հարցեր կան, որ Հանրային խորհուրդը պետք է բարձրաձայնի, դիմի կառավարությանը, քննարկի։ Վերջին հաշվով, կառավարություն-ժողովուրդ հասկացությունը միանշանակ չէ։ Հասարակական կարծիք ձևավորելու անհրաժեշտություն կա, այդ կարծիքը իշխանություններին մատուցելու խնդիր կա։ Մինչև հիմա Հանրային խորհուրդը հենց այս հարցերն էր քննարկում։ Մենք համաներման մասին հարց ենք քննարկել, տարբեր այլ հարցեր։ Դրանից բացի՝ ժողովուրդը բազմաթիվ հարցերով դիմում է ուղիղ մեզ, մենք դրա հետ կապված քննարկում ենք կազմակերպում ու դիմում կառավարությանը դրա հետ կապված»,- ասաց Սաֆարյանը։
Մեր դիտարկմանը, հիմա, երբ կա ժողովրդի կողմից վստահություն վայելող իշխանություն, անհրաժեշտություն կա՞ միջնորդական առաքելություն իրականացնել ժողովրդի ու իշխանության միջև, Սաֆարյանը պատասխանեց. «Միշտ էլ դրա անհրաժեշտությունը կա։ Հասարակությանը հուզող հարցերը ոչ բոլորը հնարավոր է անմիջապես քննարկել կառավարությունում։ Կա հարցերի շրջանակ, որը պետք է հանրությունը իր ուժերով քննարկի, նոր ներկայացնի կառավարությանը։ Որքան էլ նոր կառավարությունը հայտարարի, որ բաց է, ժողովրդի տրամադրության տակ է, միշտ էլ կան հարցեր, որոնք անհրաժեշտ կլինի քննարկել Հանրային խորհրդի ձևաչափով, մասնագետների կողմից»։ Սաֆարյանը հավելեց նաև, որ ելնելով մարդկանց նամակներից, հեռախոսազանգերից, Հանրային խորհուրդը մեծ վստահություն է վայելում այսօր ժողովրդի կողմից և շատ անելիք ունի։