Մեծ Բրիտանիայի գիտնականները պատահաբար մրսածության դեղամիջոց են ստեղծել, որը կարելի է ընդունել ցանկացած ախտանիշի դեպքում։ Հաբերը թույլ չեն տա վարակին ներթափանցել մարդու բջիջների մեջ։ Այս մասին հաղորդում է Nature Chemistry ամսագիրը։
Լոնդոնի թագավորական քոլեջի գիտնական Էդ Թեյնթի խոսքերով՝ այս դեղամիջոցը պատահաբար է ստեղծվել, երբ իրենք աշխատել են մալարիան կանխող դեղամիջոցի վրա։
Այդ փորձերի ժամանակ գիտնականներն առանձնացրել են սպիտակուցային շղթաները և փորձել են միացնել դրանք հազարավոր արդեն գոյություն ունեցող դեղորայքային մոլեկուլների հետ՝ կիրառելով համակարգչային սիմուլացիան։ Այդ գիտափորձերի ընթացքում թիմը հայտնաբերել է IMP-72 նյութը, որն ավելի շատ միանում էր ոչ թե պլազմոդիումի ֆերմենտներին, այլ դրա մարդկային տարբերակին։
Քիմիկոսները կատարելագործել են հայտնաբերած նյութը՝ ուղղելով դրա գործողությունը կոնկրետ սպիտակուցների վրա։ Քաղցկեղային բջիջների վրա արված փորձերը ցույց են տվել, որ IMP-1088-ի նոր տարբերակը կարող է ազդեցիկ կերպով պայքարել մրսածության ավելի տարածված տեսակների դեմ։ Ընդ որում, պարզվել է, որ նյութը օգտակար է թե պրոֆիլակտիկայի համար, թե՝ որպես դեղամիջոց։